മലയാളത്തിന്റെ പ്രിയ നടൻ ജഗതി ശ്രീകുമാറിന്റെ അഭിനയത്തിനിടയിലെ ചില പ്രകടനങ്ങളെക്കുറിച്ച് നടൻ എബ്രഹാം കോശി. അഭിനയിച്ചു കൊണ്ടിരിക്കുമ്പോള് ചില ഭാവങ്ങളും ഡയലോഗുകളും ജഗതി കൈയിൽ നിന്നും ഇടുമെന്നാണ് നടൻ പറയുന്നത്. ഒരു ഓൺലൈൻ ചാനലിന് നൽകിയ അഭിമുഖത്തിലാണ് ഇക്കാര്യം പറയുന്നത്.
കയ്യിൽ നിന്നും ഇടുന്നതിൽ ഏറ്റവും സഹിക്കാന് പറ്റാത്തത് അമ്പിളി ചേട്ടനെയാണ്. ജഗതി ശ്രീകുമാർ… ജോഷി സാര് പറഞ്ഞിട്ടുണ്ട് എന്റെ അമ്പിളി നീ ഏതേലും ഒന്ന് ഫിക്സ് ചെയ്യ്, നമുക്ക് ഷോട്ട് എടുത്ത് പോകണ്ടേയെന്ന്. രണ്ടോ മൂന്നോ റിഹേഴ്സല് കാണും. ക്യാമറ റിഹേഴ്സൽ, ഡയലോഗ് റിഹേഴ്സൽ അങ്ങനെ…
ഓരോ തവണയും പുള്ളി ഓരോ എക്സ്പ്രഷനാണ് ഇടുന്നത്. നിൽക്കുന്ന സംവിധായകന് ഉള്പ്പടെ എല്ലാവരും ചിരിക്കും. ടേക്ക് വരുമ്പോള് ഇതൊന്നുമല്ല, ഇതിന്റെയൊക്കെ മുകളില് വരുന്നൊരു സാധനം കാണിക്കും. എല്ലാം ചിരിച്ചു. സാറൊന്ന് നോക്കി, ഓക്കെ റീ ടേക്ക്. രണ്ടാമത് എടുത്തു. അപ്പോള് വേറൊരു സാധനം ഇട്ടു. അപ്പോഴും കൂടെ നിൽക്കുന്നവരൊക്കെ ചിരി.
അങ്ങനെ മൂന്ന്- നാല് ടേക്ക് ആയപ്പോഴാണ് ജോഷി സര് പറഞ്ഞത്. ‘എടാ അമ്പിളി നീ ഏതെങ്കിലും ഒന്ന് ഫിക്സ് ചെയ്യ്, നമുക്ക് ഷോട്ട് എടുക്കണ്ടേ. ആ ജോഷിയേട്ടാ, ഇത് ഫിക്സ് ചെയ്തു എന്ന് അദ്ദേഹം പറഞ്ഞു. മാറ്റമൊന്നുമില്ലല്ലോ? ഇല്ല മാറ്റമില്ല. ടേക്ക് പോയി. പുള്ളി വേറൊരു സാധനം കാണിച്ചു. ബോര് അല്ലല്ലോ കാണിക്കുന്നത്. ഒന്നിനൊന്ന് മെച്ചമാണ് കാണിക്കുന്നത്. അതെങ്ങനെ വേണ്ടെന്ന് പറയാന് സാധിക്കും.
ഒരു കോമഡി സീനിൽ ഒന്നിനൊന്ന് മെച്ചമായ എക്സ്പ്രെഷനാണ് പുള്ളി കാണിക്കുന്നത്. ലോകത്തില് അദ്ദേഹത്തെ പോലെ സിനിമ ഫീൽഡിൽ കോമഡി മാത്രം ചെയ്ത് മുപ്പത് വര്ഷം ജീവിച്ച വേറൊരു ആര്ടിസ്റ്റിനെ പറയാമോ? ലോകത്തില്ല, അടിമുടി നടനാണ്. തിരമാല പോലെ ഭാവങ്ങള് വന്നു കൊണ്ടിരിക്കും’ എന്നാണ് എബ്രഹാം കോശി പറയുന്നത്.