ബോളിവുഡ് പ്രേക്ഷകരുടെ പ്രിയതാരമാണ് ജാൻവി കപൂർ. 2018-ൽ പുറത്തിറങ്ങിയ ‘ദഡക്ക്’ എന്ന ചിത്രത്തിലൂടെയാണ് താരപുത്രി സിനിമയിൽ അരങ്ങേറ്റം കുറിക്കുന്നത്. പിന്നീട് ഗോസ്റ്റ് സ്റ്റോറീസ്, റൂഹി, മിലി തുടങ്ങീ നിരവധി ചിത്രങ്ങളിലൂടെ ശ്രദ്ധേയപ്രകടനമാണ് താരം കാഴ്ചവെച്ചത്.
ജാൻവിയുടെ ഏറ്റവും പുതിയ ചിത്രം ‘മിസ്റ്റര് ആന്ഡ് മിസിസ് മഹി’ തിയേറ്ററുകളിൽ എത്തിയിരിക്കുകയാണ്. രാജ്കുമാർ റാവുവും ചിത്രത്തിൽ ജാൻവിക്കൊപ്പം പ്രധാന വേഷത്തിലെത്തുന്നുണ്ട്. ക്രിക്കറ്റ് പ്രമേയമാവുന്ന ചിത്രത്തിന് വേണ്ടി രണ്ട് വർശത്തോളം ജാൻവി ക്രിക്കറ്റ് പരിശീലിച്ചിരുന്നു.
ഇപ്പോഴിതാ അതിന്റെ മേക്കിങ് വീഡിയോ പുറത്തുവിട്ടിരിക്കുകയാണ് ജാൻവി കപൂർ. ക്രിക്കറ്റ് പരിശീലനത്തിനിടെ തന്റെ തോളുകൾ സ്ഥാനം തെറ്റിയെന്നും, ഒരുപാട് കാലം ക്രിക്കറ്റ് പരിശീലിച്ചെന്നും ജാൻവി നേരത്തെ വെളിപ്പെടുത്തിയിരുന്നു. ഇപ്പോഴിതാ ഇൻസ്റ്റഗ്രാമിൽ പങ്കുവെച്ച ബിഹൈൻഡ് ദി സീൻ വീഡിയോയിൽ തനിക്കെതിരെ കമന്റുമായി എത്തിയ ഒരാളോട് മറുപടി പറഞ്ഞിരിക്കുകയാണ് ജാൻവി കപൂർ. ‘ടെന്നീസ് ബോൾ ഉപയോഗിച്ച് കളിച്ചതുകൊണ്ടാണോ ഇത്രയും വലിയ പരിക്ക്’ എന്നാണ് ഒരാൾ പരിഹാസ രൂപേണ ചോദിക്കുന്നത്.
“ഞാൻ സീസൺ ബോൾ ഉപയോഗിച്ച് കളിച്ചപ്പോഴാണ് എനിക്ക് പരുക്കേറ്റത്. അതുകൊണ്ടാണ് ടെന്നീസ് ബോളിലേക്ക് മറേണ്ടി വന്നത്. നിങ്ങൾ ബാൻഡേജ് കാണുന്നില്ലേ. വീഡിയോ പരുക്കിന് ശേഷമുള്ളതാണ്. നിങ്ങൾ എന്നെ കളിയാക്കുന്നതിന് മുമ്പ് വീഡിയോ കണ്ടിരുന്നെങ്കിൽ, നിങ്ങളുടെ തമാശ കേട്ട് എനിക്കും ചിരിക്കാമായിരുന്നു.” എന്നാണ് ജാൻവി ഇതിന് നൽകിയ മറുപടി.