ലോകേഷിന്റെ സിനിമാറ്റിക് യൂണിവേഴ്സിൽ നായകരോളം കയ്യടി നേടിയ കഥാപാത്രമാണ് അർജുൻ ദാസ് അവതരിപ്പിച്ച അടക്കളം ദാസിന്റെ സഹോദരൻ അൻപ് ദാസ്. അർജുൻ ദാസിന്റെ ഘനഗാംഭീര്യമായ ശബ്ദവും ശരീരഘടനയും ഇന്നും പ്രേക്ഷകർ ഓർത്തിരിക്കുന്നു. കൈതിയിലും, വിക്രത്തിലും അൻപ് ദാസ് ഗംഭീര പ്രകടനമാണ് നടത്തിയത്.
ഇപ്പോഴിതാ എൽസിയു ചിത്രങ്ങളിൽ അൻപ് ദാസ് കേന്ദ്ര കഥാപാത്രമാവുന്ന ഒരു ചിത്രത്തിന് സാധ്യതയുണ്ടെന്ന് വെളിപ്പെടുത്തിയിരിക്കുകയാണ് അർജുൻ ദാസ്. കൂടാതെ എൽസിയുവിലെ ഓരോ കഥാപാത്രത്തെ വെച്ചും സ്റ്റാൻഡ് എലോൺ ചിത്രത്തിനുള്ള സാധ്യതയുണ്ടെന്നും അർജുൻ ദാസ് പറയുന്നു.
“എൽ.സി.യുവിൽ ഓരോ കഥാപാത്രത്തെ വെച്ചും ഒരു സ്റ്റാൻഡ് എലോൺ സിനിമ ചെയ്യാനുള്ള കഥ ലോകേഷിൻ്റെ കൈയിലുണ്ട്. അൻപിനെ വെച്ച് ഒരു സ്റ്റാൻഡ് എലോൺ സിനിമയുടെ കഥ ലോകേഷ് എന്നോട് പറഞ്ഞിട്ടുണ്ട്. ഈ യൂണിവേഴ്സിൻ്റെ ആരംഭം എങ്ങനെയാണെന്ന് വിശദമായി കാണിക്കുന്ന കഥയാണ്. കേട്ടപ്പോൾ തന്നെ എനിക്ക് വലിയ ആവേശമായി.
കൈതി 2 ആണ് എൽ.സി.യുവിലെ അടുത്ത സിനിമ. പിന്നെ റോളക്സിനെ വെച്ചൊരു സിനിമ പ്ലാൻ ചെയ്യുന്നുണ്ട്. ലിയോ ദാസിൻ്റെ ബാക്ക് സ്റ്റോറി എന്തായിരുന്നുവെന്ന് കാണിച്ചുകൊണ്ട് ഒരു സിനിമ ചിലപ്പോൾ ഉണ്ടാകാം. പിന്നെ വിക്രം 2. അതിലായിരിക്കും എല്ലാ കഥാപാത്രങ്ങളും ഒരുമിച്ച് വരിക. അൻപിന്റെ സ്റ്റാൻഡ് എലോൺ സിനിമ ലോകേഷ് ചെയ്യണമെന്നാണ് എന്റെ ചെറിയൊരു അത്യാഗ്രഹം.” എന്നാണ് എസ്എസ് മ്യൂസികിന് നൽകിയ അഭിമുഖത്തിൽ അർജുൻ ദാസ് പറഞ്ഞത്.