തെന്നിന്ത്യൻ പ്രേക്ഷകർ ഏറ്റവും കൂടുതൽ പ്രതീക്ഷയോടെ കാത്തിരിക്കുന്ന ചിത്രമാണ് വിജയ്- വെങ്കട് പ്രഭു കൂട്ടുകെട്ടിൽ പുറത്തിറങ്ങുന്ന ‘ദി ഗ്രേറ്റസ്റ്റ് ഓഫ് ഓൾ ടൈം’ (ഗോട്ട്) എന്ന ചിത്രം. സയൻസ് ഫിക്ഷൻ ഴോണറിൽ പുറത്തിറങ്ങുന്ന ചിത്രത്തിൽ ടൈം ട്രാവലും പ്രമേയമാവുന്നുണ്ടെന്നാണ് പുറത്തുവരുന്ന റിപ്പോർട്ടുകൾ.
വിജയ് ഇരട്ട വേഷത്തിലെത്തുന്ന ചിത്രത്തിൽ മലയാളിയായ പാർവതി നായരും വേഷമിടുന്നുണ്ട്. ഇപ്പോഴിതാ ചിത്രത്തെ കുറിച്ച് സംസാരിക്കുകയാണ് പാർവതി നായർ. തുടക്കം മുതൽ ഒടുക്കം വരെ പ്രേക്ഷകനെ ആകാംക്ഷയുടെ മുൾമുനയിൽ നിർത്തുന്ന ചിത്രമായിരിക്കും ഗോട്ട് എന്നാണ് പാർവതി പറയുന്നത്.
“വിജയ് ഏറ്റവും മികച്ച നടനാണ്. സിനിമയിൽ പല വമ്പൻ താരങ്ങളെയും കടത്തിവെട്ടാൻ അദ്ദേഹത്തിന്റ താരപദവി കൊണ്ട് സാധിച്ചിട്ടുണ്ട്. ഞാൻ ഇതുവരെ ചെയ്യാത്ത കഥാപാത്രമാണ് ഗോട്ട് സിനമയിൽ എനിക്ക് ലഭിച്ചിരിക്കുന്നത്, ബോൾഡായ കഥാപാത്രം. ഒരുപാട് പരീക്ഷണങ്ങളുള്ള സിനിമയാണിത്. ആക്ഷനും ത്രില്ലും, ട്വിസ്റ്റ് ആൻഡ് ടേൺസുമൊക്കെ കല‍‍ർന്ന ഒരു ചിത്രമായിരിക്കും ഗോട്ട്” എന്നാണ് പാർവതി നായർ ചിത്രത്തെ കുറിച്ച് സംസാരിച്ചത്
പ്രശാന്ത്, പ്രഭു ദേവ, സ്നേഹ, ലൈല, ജയറാം, മീനാക്ഷി ചൗധരി, മോഹൻ, അജ്മൽ അമീർ, യോഗി ബാബു, വിടിവ ഗണേഷ്, തുടങ്ങി വൻതാരനിരയാണ് ചിത്രത്തിൽ അണിനിരക്കുന്നത്. എ. ജി. എസ് എന്റർടൈൻമെന്റാണ് ചിത്രം നിർമ്മിക്കുന്നത്. ലിയോക്ക് ശേഷം എത്തുന്ന വിജയ് ചിത്രമെന്ന പ്രത്യേകതയും ഗോട്ടിനുണ്ട്.
യുവൻ ശങ്കർ രാജയാണ് ചിത്രത്തിന് സംഗീതമൊരുക്കുന്നത്. സയൻസ് ഫിക്ഷൻ ഴോണറിലുള്ള ചിത്രത്തിന് വേണ്ടി വിര്‍ച്വൽ പ്രൊഡക്‌ഷന്റെ ഭാഗയമായുള്ള സെറ്റ് വർക്കുകളുടെ ചിത്രങ്ങള്‍ വെങ്കട് പ്രഭു പങ്കുവെച്ചതും ഇതിനുവേണ്ടി വിജയ്‌യും സംവിധായകനും അമേരിക്ക സന്ദർശിച്ചതും വാർത്തകളിലിടം നേടിയിരുന്നു.