സിനിമാ പ്രമോഷനിടെ തെലുങ്ക് താരം നന്ദമുരി ബാലകൃഷ്ണ തന്നെ തള്ളിമാറ്റിയ സംഭവത്തില് പ്രതികരിച്ച് നടി അഞ്ജലി. ഗ്യാങ്സ് ഓഫ് ഗോദാവരി എന്ന സിനിമയുടെ പ്രമോഷന് പരിപാടിക്കിടെ ആയിരുന്നു ഈ സംഭവം. ഇത് വലിയ വിവാദമായി മാറിയിരുന്നു. ഇപ്പോഴിതാ സംഭവത്തില് വിശദീകരണവുമായി രംഗത്തെത്തിയിരിക്കുകയാണ് അഞ്ജലി.
ബാലകൃഷ്ണയോട് ബഹുമാനമാണെന്ന് പറഞ്ഞുകൊണ്ട് താരത്തെ പിന്തുണച്ചാണ് അഞ്ജലിയുടെ പോസ്റ്റ്. ഗ്യാങ്സ് ഓഫ് ഗോദാവരി പ്രീ-റിലീസ് ഇവന്റില് പങ്കെടുത്തതിന് ബാലകൃഷ്ണയോട് നന്ദി പറയാന് താന് ആഗ്രഹിക്കുന്നു എന്നാണ് അഞ്ജലി എഴുതിയത്.
താനും ബാലകൃഷ്ണയും പരസ്പര ബഹുമാനം കാത്തുസൂക്ഷിക്കുന്നുണ്ട്. കൂടാതെ വളരെക്കാലമായി നല്ല സൗഹൃദം പങ്കിടുന്നുവെന്ന് പറയാനും താന് ആഗ്രഹിക്കുകയാണ്. അദ്ദേഹത്തോടൊപ്പം വീണ്ടും വേദി പങ്കിടാന് സാധിച്ചതിലെ സന്തോഷം അറിയിച്ചുകൊണ്ടാണ് അഞ്ജലി കുറിപ്പ് അവസാനിപ്പിച്ചത്.
ചടങ്ങില് നിന്നുള്ള ഒരു വീഡിയോയും അവര് പങ്കുവെച്ചിട്ടുണ്ട്. ബാലകൃഷ്ണയേക്കുറിച്ചുള്ള അഞ്ജലിയുടെ വാക്കുകള് പലരിലും അദ്ഭുതമാണുണ്ടാക്കിയത്. അതേസമയം, വേദിയില് വച്ച് അണിയറ പ്രവര്ത്തകര്ക്കൊപ്പം ഫോട്ടോ എടുക്കുമ്പോഴായിരുന്നു വിവാദമായ സംഭവം.
രോഷാകുലനായി മാറി നില്ക്കെന്ന് ആവശ്യപ്പെട്ടാണ് നടി അഞ്ജലിയെ ബാലകൃഷ്ണ തള്ളിമാറ്റിയത്. പെട്ടന്നുള്ള അദ്ദേഹത്തിന്റെ പെരുമാറ്റം കണ്ട് അഞ്ജലിയും കൂടെ നിന്നിരുന്ന നടി നേഹ ഷെട്ടിയും ഞെട്ടിപ്പോയി. തുടര്ന്ന് രണ്ട് നടിമാരും ഒരുമിച്ച് പൊട്ടിച്ചിരിക്കുന്നതും പുറത്തുവന്ന വീഡിയോയിലുണ്ടായിരുന്നു.