ഏറെ ആഘോഷിക്കപ്പെട്ട വിജയ് ചിത്രങ്ങളില് ഒന്നാണ് ‘നന്പന്’. ശങ്കറിന്റെ സംവിധാനത്തില് എത്തിയ ചിത്രം 2012ല് ആണ് പുറത്തിറങ്ങിയത്. എന്നാല് സിനിമയില് നിന്നും വിജയ് പിണങ്ങി പോയിരുന്നു. ചിത്രത്തിലെ പ്രധാന കഥാപാത്രങ്ങളില് ഒരാളായ നടന് ശ്രീകാന്ത് ആണ് ഇക്കാര്യം വെളിപ്പെടുത്തിയിരിക്കുന്നത്.
നന്പന് സിനിമയുടെ സെറ്റില് ഏറ്റവും അവസാനം ജോയിന് ചെയ്തത് ഞാനാണ്. സെറ്റില് എത്തിയപ്പോള് തന്നെ നേരെ പോയത് ശങ്കര് സാറിനെ കാണാനാണ്. അപ്പോള് അവിടെ നിന്നും വിജയ് സര് ഇറങ്ങിവരുന്നതു കണ്ടു. അദ്ദേഹത്തെ നോക്കി ചിരിച്ചെങ്കിലും എന്നെ മൈന്ഡ് ചെയ്യാതെ പോയി.
പിന്നെയാണ് അറിയുന്നത് വിജയ് സാറും ശങ്കര് സാറും തമ്മില് എന്തോ വഴക്കുണ്ടായെന്ന്. വിജയ് സാറിന്റെ ഹെയര്സ്റ്റൈലിനെ ചൊല്ലിയായിരുന്നു വഴക്ക്. സംഭവം കാര്യമായതോടെ സെറ്റില് നിന്നും വിജയ് സര് ഇറങ്ങിപ്പോയി. ശങ്കര് സാറിനും ഒരേ ദേഷ്യം.
വിജയ് പോയാല് ആ റോളിലേക്ക് മഹേഷ് ബാബുവിനെയോ അല്ലെങ്കില് ആദ്യം തീരുമാനിച്ചതുപോലെ സൂര്യയെയോ വിളിക്കാമെന്ന് ശങ്കര് സര് പറഞ്ഞു. പക്ഷേ എന്റെ പേടി ഇതൊന്നുമായിരുന്നില്ല. ആ പടത്തിന് വേണ്ടി വേറെ അഞ്ച് സിനിമകളാണ് ഞാന് വേണ്ടെന്നു വച്ചത്.
അതൊക്കെ ക്യാന്സല് ചെയ്ത ശേഷമാണ് സെറ്റിലേക്കെത്തുന്നതും. ആ സിനിമ മുടങ്ങിയിരുന്നെങ്കില് വലിയ നഷ്ടമായേനെ. പിന്നീട് അതേ കാസ്റ്റില് തന്നെ സിനിമ പൂര്ത്തിയാകുകയും ചെയ്തു എന്നാണ് ശ്രീകാന്ത് പറയുന്നത്. നടന് ജീവ, സത്യരാജ്, ഇല്യാന ഡിക്രൂസ്, സത്യന് എന്നിവരാണ് ചിത്രത്തില് മറ്റ് പ്രധാന വേഷങ്ങളില് എത്തിയത്.