രജനികാന്ത് ചിത്രം ജയിലറിലൂടെ തെന്നിന്ത്യൻ സിനിമ പ്രേക്ഷകർക്ക് കുറച്ചുകൂടെ പ്രിയപ്പെട്ട താരമായി മാറിയ നടനാണ് കന്നഡ താരം ശിവ രാജ്കുമാർ. തന്റെ ഏറ്റവും പുതിയ ചിത്രമായ ‘ഗോസ്റ്റി’ന്റെ തിരക്കിലാണ് ശിവ രാജ്കുമാർ ഇപ്പോൾ.
ഇപ്പോഴിതാ അകാലത്തിൽ മരണപ്പെട്ടുപോയ തന്റെ സഹോദരൻ പുനീത് രാജ്കുമാറിനെ ഓർക്കുകയാണ് ശിവ രാജ്കുമാർ. നെൽസൺ ദിലീപ് കുമാറിന്റെ ഏതെങ്കിലുമൊരു ചിത്രത്തിൽ അഭിനയിക്കാൻ പുനീതിന് ആഗ്രഹമുണ്ടായിരുന്നെന്നും അത് നടന്നില്ലെന്നും ശിവ രാജ്കുമാർ പറയുന്നു.
“സഹോദരനായിട്ടല്ല ഞാൻ പുനീതിനെ കണ്ടിട്ടുള്ളത്. എന്റെ ഏറ്റവും അടുത്ത സുഹൃത്തായിരുന്നു അവൻ. എന്നെക്കാൾ പതിനാല് വയസിന് ചെറുപ്പമായിരുന്നെങ്കിലും ഒരു അനിയനെ പോലെ ആയിരുന്നില്ല അവനെനിക്ക്. അവൻ ഇവിടം വിട്ടുപോയെന്ന് എനിക്ക് തോന്നുന്നേയില്ല. അവൻ ഞങ്ങൾക്കൊപ്പം ഉണ്ടെന്ന് എനിക്കറിയാം. രാജ് കുമാർ കുടുംബത്തിൽ ജനിച്ചതിൽ അഭിമാനം തോന്നുന്നു. മറ്റ് സംസ്ഥാനങ്ങളിൽ നിന്നുള്ള സ്നേഹവും പിന്തുണയും ഞങ്ങൾക്ക് ലഭിക്കുന്നു.
നെൽസൺ സംവിധാനം ചെയ്യുന്ന ഏതെങ്കിലുമൊരു ചിത്രത്തിൽ ചെറിയ വേഷമെങ്കിലുംചെയ്യണമെന്ന് അവന് അതിയായ ആഗ്രഹമുണ്ടായിരുന്നു. പക്ഷേ അത് ചെയ്യാനുള്ള ഭാഗ്യം എനിക്കാണ് ലഭിച്ചത്.” സില്ലി മോങ്ക്സ് മോളിവുഡിന് നൽകിയ അഭിമുഖത്തിലാണ് ശിവ രാജ്കുമാർ മനസുതുറന്നത്.
60 കോടി ബഡ്ജറ്റിൽ പാൻ ഇന്ത്യൻ ചിത്രമായാണ് എം. ജി ശ്രീനിവാസൻ സംവിധാനം ചെയ്യുന്ന ഗോസ്റ്റ് ഒരുങ്ങുന്നത്. ജയറാമും അനുപം ഖേറും ചിത്രത്തിൽ പ്രധാന വേഷങ്ങൾ അവതരിപ്പിക്കുന്നുണ്ട്. ഒക്ടോബർ 19 നാണ് ചിത്രത്തിന്റെ റിലീസ്.