ഒന്നാം വിവാഹവാര്ഷികം ആഘോഷിച്ച് നടന് ബാലയും ഭാര്യ കോകിലയും. വിവാഹജീവിതത്തിലെ ആദ്യ വര്ഷത്തില് തങ്ങള് കടന്നുപോയത് മറ്റ് ദമ്പതികള്ക്കൊന്നും ഉണ്ടാകാത്ത സാഹചര്യങ്ങളിലൂടെയാണെന്നും, എന്നാല് ഈ കാലയളവില് പരസ്പരം വിട്ടുകൊടുക്കാതെ ഒന്നിച്ചു നിന്നുവെന്നും ബാല സോഷ്യല് മീഡിയയില് പങ്കുവച്ച വീഡിയോയില് വ്യക്തമാക്കി. തങ്ങളെ പിന്തുണച്ചവര്ക്ക് നന്ദിയും ഇരുവരും അറിയിച്ചു.
ബാലയുടെ നാലാം ഭാര്യയാണ് കോകില. 2024 ഒക്ടോബര് 23ന് ആണ് ബാലയും കോകിലയും വിവാഹിതരായത്. എറണാകുളം കലൂര് പാവക്കുളം ക്ഷേത്രത്തില് വെച്ച് അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തിലായിരുന്നു ചടങ്ങുകള്. ബാലയുടെ മാതൃസഹോദരന്റെ മകളാണ് തമിഴ്നാട് സ്വദേശിനിയായ കോകില.
”എല്ലാവര്ക്കും നമസ്കാരം, ഞങ്ങളുടെ ആദ്യ വിവാഹ വാര്ഷികമാണിന്ന്. കഴിഞ്ഞ കാലത്തെ കുറിച്ച് ചിന്തിച്ചു നോക്കുമ്പോള് ഒരു കാര്യം പറയാം. ഒരു ദമ്പതിമാരും കടന്നുപോകാത്ത സാഹചര്യത്തിലൂടെയാണ് ഈ ഒരു വര്ഷം ഞങ്ങള് കടന്നു പോയത്. പോസിറ്റിവ് ആയുള്ള കാര്യം കൂടി പറയാം, കല്യാണം കഴിഞ്ഞ് എല്ലാവരും ഹണിമൂണിന് പോകും.”
”ഈ ഒരു കൊല്ലത്തില് കേസും കോടതിയും പൊലീസ് സ്റ്റേഷനുമൊക്കെയായി ഒരുപാട് കഷ്ടതകള് അനുഭവിച്ചു. ഇതിലുള്ള പോസിറ്റീവ് കാര്യം പറഞ്ഞാല് എത്ര കഷ്ടപ്പാട് വന്നാലും ഭാര്യയും ഭര്ത്താവും എന്ന നിലയില് ഒരു നിമിഷം പോലും ഞങ്ങള് രണ്ടു പേരും വിട്ടുകൊടുത്തിട്ടില്ല. ഞങ്ങള് ഒന്നിച്ചാണ് നിന്നത്. ഈ ഒക്ടോബര് 23 വരെയുള്ള ഒരു കൊല്ലം ഞങ്ങള് ജീവിച്ചത് 100 കൊല്ലം ഒന്നിച്ചു ജീവിച്ചത് പോലെയാണ്.”
”എത്ര കഷ്ടപ്പാട് വന്നാലും ബാലയും കോകിലയും നല്ലൊരു ജീവിതം ജീവിക്കണമെന്നു പ്രാര്ഥിച്ച എല്ലാവരോടും നന്ദി. നന്ദി പറഞ്ഞു തീര്ക്കാന് പറ്റില്ല. ഒരുപാട് സ്നേഹം അറിയിക്കുന്നു. നല്ലതുവരട്ടെ. നല്ല കാര്യങ്ങള് നടക്കട്ടെ. ഞങ്ങളുടെ കുടുംബ ജീവിതം ഒരു വര്ഷം തികയുമ്പോള് ഇതുവരെ കൂടെ നിന്ന എല്ലാവരോടും ഒരുപാട് സ്നേഹം” എന്നാണ് ബാല പറയുന്നത്.