നിതേഷ് തിവാരി സംവിധാനം ചെയ്യുന്ന ‘രാമായണ’ സിനിമയില് അഭിനയിച്ചതിന് താന് ഒരു രൂപ പോലും പ്രതിഫലം വാങ്ങിച്ചിട്ടില്ലെന്ന് നടന് വിവേക് ഒബ്റോയ്. പ്രതിഫലത്തുക കാന്സര് ബാധിച്ച കുട്ടികള്ക്കായി സംഭാവന ചെയ്യുമെന്നാണ് വിവേക് പറയുന്നത്. രണ്ബിര് കപൂര് നായകനാവുന്ന ചിത്രത്തില് രാവണന്റെ സഹോദരനായ വിഭീഷണന്റെ വേഷത്തിലാണ് വിവേക് എത്തുന്നത്.
ഹിന്ദുസ്ഥാന് ടൈംസിന് നല്കിയ അഭിമുഖത്തിലാണ് തന്റെ പ്രതിഫലത്തെ കുറിച്ച് വിവേക് സംസാരിച്ചത്. നിര്മ്മാതാവായ നമിത്തിനോട് ഇതിനെ കുറിച്ച് സംസാരിച്ചതായാണ് വിവേക് പറഞ്ഞത്. ”ഈ സിനിമയ്ക്ക് എനിക്ക് പ്രതിഫലമായി ഒരു രൂപ പോലും വേണ്ടെന്ന് ഞാന് പറഞ്ഞു. ഞാന് വിശ്വസിക്കുന്ന ഒരു ലക്ഷ്യത്തിനായി, അതായത് കാന്സര് ബാധിച്ച കുട്ടികള്ക്കായി, സംഭാവന ചെയ്യാന് ഞാന് ആഗ്രഹിക്കുന്നു.”
”നിങ്ങള് ചെയ്യുന്നത് ഞാന് ഇഷ്ടപ്പെടുന്നു, ഇത് ഇന്ത്യന് സിനിമയെ ആഗോളതലത്തില് എത്തിക്കുമെന്ന് കരുതുന്നതിനാല് ഞാന് നിങ്ങളുടെ കൂടെയുണ്ടാവാന് ആഗ്രഹിക്കുന്നുവെന്ന് ഞാന് അദ്ദേഹത്തോട് പറഞ്ഞു. രാമായണം പുരാണമാണോ ചരിത്രപരമാണോ എന്ന കാര്യത്തില് എപ്പോഴും ഒരു തര്ക്കമുണ്ട്. അത് ചരിത്രപരമാണെന്ന് ഞങ്ങള് വിശ്വസിക്കുന്നു.”
”അതിന്റെ ഭാഗമാകുന്നത് വളരെ മികച്ച തീരുമാനമായിരുന്നു. നടന്മാരായ നമിത്, നിതേഷ്, യാഷ്, രാകുല് പ്രീത് സിങ് എന്നിവരോടൊപ്പം പ്രവര്ത്തിക്കാന് കഴിഞ്ഞതില് സന്തോഷം. എനിക്ക് ഇനിയും രണ്ട് ദിവസത്തെ ഷൂട്ട് ബാക്കിയുണ്ട്. രാമായണത്തിലൂടെ നിര്മ്മാതാവ് നമിതും നിതേഷും യഥാര്ത്ഥത്തില് ഭാരതീയ സിനിമയെ ആഗോള വേദിയിലേക്ക് ഉയര്ത്തുകയാണ്.”
”ഹോളിവുഡ് ഇതിഹാസങ്ങള്ക്കുള്ള ഇന്ത്യയുടെ ഉത്തരമായിരിക്കും രാമായണം. വിഎഫ്എക്സിന്റെ കാര്യത്തില് ഏകദേശം ഏഴ് മുതല് എട്ട് വരെ ഓസ്കര് നേടിയ ഒരു കമ്പനിയുമായി അവര് ബന്ധപ്പെട്ടിരിക്കുന്നു. അവര് ഇതിനകം തന്നെ അത്തരം കാര്യങ്ങള് പൂര്ത്തിയാക്കിയിട്ടുണ്ട്. യഥാര്ത്ഥത്തില് ഇന്ത്യന് വേരുകളുള്ള ഒരു ഇതിഹാസത്തെ ഉള്ക്കൊള്ളാന്, രാമായണത്തേക്കാള് വലുതും മികച്ചതുമായ മറ്റൊന്നില്ല” എന്നാണ് വിവേക് ഒബ്റോയ് പറയുന്നത്.