ലൂസിഫര്, കടുവ എന്നീ മലയാളം സിനിമകളിലെ വില്ലനായി എത്തിയ മോളിവുഡിലും ഏറെ പരിചിതനാണ് ബോളിവുഡ് താരം വിവേക് ഓബ്റോയ്. ഒരു കാലത്ത് ബോളിവുഡില് ഏറെ ഹിറ്റ് സിനിമകള് വിവേകിന്റെതായി എത്തിയിട്ടുണ്ടെങ്കിലും അധികം അവസരങ്ങള് താരത്തിന് ലഭിച്ചിരുന്നു. ബോളിവുഡില് താന് ലോബിയിംഗിന് ഇരയാണെന്ന് തുറന്ന് പറഞ്ഞിരിക്കുകയാണ് വിവേക് ഒബ്റോയ്.
”ഞാന് കുറച്ചുകാലമായി മറ്റ് ചില ബിസിനസുകള് ചെയ്യുകയാണ്. എന്റെ സിനിമകള് ഹിറ്റായിരുന്ന ഒരു കാലഘട്ടം ജീവിതത്തില് ഉണ്ടായിരുന്നു. എന്റെ പ്രകടനം അഭിനന്ദിക്കപ്പെട്ടിട്ടും മറ്റ് കാരണങ്ങളാല് ഒരു റോളും ലഭിക്കാതായി. നമ്മള് ഒരു സിസ്റ്റത്തിന്റെയും ലോബിയുടെയും ഇരയാകുമ്പോഴാണ് അങ്ങനെ സംഭവിക്കുന്നത്.”
”ഇത്തരം ഒരു അവസ്ഥയില്, വിഷാദത്തിലാകുക അല്ലെങ്കില് അതൊരു വെല്ലുവിളിയായി എടുത്ത് നിങ്ങളുടെ സ്വന്തം വിധി എഴുതുക, ഈ രണ്ട് ഓപ്ഷനേ നിങ്ങളുടെ മുന്നിലുണ്ടാകൂ. മറ്റൊരു പാത തിരഞ്ഞെടുത്ത് ബിസിനസ് ആരംഭിക്കാനാണ് ഞാന് തീരുമാനിച്ചത്” എന്നാണ് വിവേക് ഓബ്റോയ് ഒരു അഭിമുഖത്തില് തുറന്നു പറഞ്ഞിരിക്കുന്നത്.
മുമ്പ് നടന് സല്മാന് ഖാനുമായി വിവേക് ഒബ്റോയ് പരസ്യമായി ഏറ്റുമുട്ടിയിരുന്നു. ഇത് താരത്തിന്റെ കരിയറിനെ ബാധിക്കുകയും ചെയ്തു. ഐശ്വര്യ റായ്യുമായുള്ള ബന്ധത്തിന്റെ പേരില് സല്മാന് തന്നെ ഭീഷണിപ്പെടുത്തി എന്നായിരുന്നു 2003ല് പത്രസമ്മേളനത്തിനിടെ വിവേക് ആരോപിച്ചത്.
സല്മാന്റെ ഇടപെടലില് തന്റെ കരിയര് തകര്ന്നുവെന്നും വിവേക് ആരോപിച്ചിരുന്നു. വിവേകിനൊപ്പം അഭിനയിക്കാന് കത്രീന കൈഫ് വിസമ്മതിച്ചതായും അന്ന് റിപ്പോര്ട്ടുകളുണ്ടായിരുന്നു. നിലവില് വെബ് സീരിസുകളിലാണ് വിവേക് ഓബ്റോയ് അബിനയിക്കുന്നത് ‘ഇന്ത്യന് പൊലീസ് ഫോഴ്സ്’ ആണ് വിവേക് നടന്റെതായി ഒടുവില് പുറത്തെത്തിയ വെബ് സീരിസ്.