താന് വിമാനം വാങ്ങിയാല് ഷാരൂഖ് ഖാനൊപ്പം സിനിമ ചെയ്യുമെന്ന് മണിരത്നം. സംവിധായകന് തമാശയായി പറഞ്ഞ കാര്യങ്ങളാണ് സോഷ്യല് മീഡിയയില് ഇപ്പോള് ശ്രദ്ധ നേടുന്നത്. 26 വര്ഷം മുമ്പ് പുറത്തിറങ്ങിയ സൂപ്പര് ഹിറ്റ് ചിത്രം ‘ദില്സേ’ ആണ് ഇരുവരും ഒന്നിച്ച അവസാന ചിത്രം. ഷാരൂഖിനെയും മണിരത്നത്തെയും ആദരിച്ച ഒരു ചടങ്ങിലാണ് ഇരുവരും സംസാരിച്ചത്.
വേണമെങ്കില് ‘ഛയ്യ ഛയ്യ’ വിമാനത്തിന് മുകളിലും കളിക്കാന് തയാറാണ് എന്നാണ് ഷാരൂഖ് പറയുന്നത്. ഇതോടെ താന് വിമാനം വാങ്ങുമ്പോള് അവസരം തരാം എന്നാണ് മണിരത്നം പറയുന്നത്. ”മണി സാര്, ഇപ്പോള് എന്ത് പറയുന്നു, എല്ലാം ഇപ്പോള് വെളിയില് വന്നിരിക്കുന്നു. ഞാന് നിങ്ങളോട് അഭ്യര്ത്ഥിക്കുകയാണ്, യാജിക്കുകയാണ്.”
”ഞാന് നിങ്ങളോട് എപ്പോഴും പറയാറുണ്ട്, എന്നോടൊപ്പം ഒരു സിനിമ ചെയ്യൂ എന്ന്. ഞാന് സത്യം ചെയ്യുന്നു, നിങ്ങള് പറഞ്ഞാല് ഞാന് ‘ഛയ്യ ഛയ്യ’ക്കായി വിമാനത്തിന് മുകളില് നൃത്തം ചെയ്യും” എന്നാണ് ഷാരൂഖ് പറയുന്നത്. ഇതിന് മറുപടിയായി ‘ഞാന് ഒരു വിമാനം മേടിക്കുമ്പോള്’ എന്നാണ് മണിരത്നം തമാശയായി പറയുന്നത്.
‘എന്നാല് ഞാന് ഒരു വിമാനം മേടിച്ചാലോ?’ എന്ന് ഷാരൂഖ് മണിരത്നത്തോട് തിരിച്ച് ചോദിക്കുന്നുമുണ്ട്. അതിന് ‘ഞാന് ചെയ്യാം’ എന്നാണ് സംവിധായകന്റെ മറുപടി. ‘മണി, എന്റെ സിനിമകള് ഇപ്പോള് എങ്ങനെയാണ് പോകുന്നതെന്ന് അറിയാമല്ലോ? വിമാനം വിധൂരമല്ല, ഞാന് വരുന്നു’ എന്നും ഷാരൂഖ് പറയുന്നുണ്ട്.
‘ഞാന് ശരിയാക്കിത്തരാം, വിഷമിക്കേണ്ട’ എന്നാണ് മണിരത്നം മറുപടി പറയുന്നത്. അതേസമയം, ‘പഠാന്’, ‘ജവാന്’ എന്നീ ചിത്രങ്ങളിലൂടെ 1000 കോടി കളക്ഷന് നേടി തകര്ന്നു കിടന്ന ബോളിവുഡിനെ കൈപിടിച്ചുയര്ത്തിയിരുന്നു. കഴിഞ്ഞ വര്ഷം പുറത്തിറങ്ങിയ ‘ഡങ്കി’ ഇപ്പോഴും തിയേറ്ററുകളില് പ്രദര്ശനം തുടരുകയാണ്.