വളരെ കുറച്ച് കാലം മാത്രം ബോളിവുഡില് ഉണ്ടായിരുന്ന താരമാണ് ഇമ്രാന് ഖാന്. അധികം സിനിമകള് ചെയ്തിട്ടില്ലാത്ത താരത്തിന്റെ മിക്ക സിനിമകളും ഫ്ളോപ്പ് ആയിരുന്നു. 2015ല് പുറത്തിറങ്ങിയ ‘കട്ടി ബട്ടി’ എന്ന ചിത്രവും പരാജയമായതോടെയാണ് ഇമ്രാന് ഖാന് തന്റെ കരിയര് അവസാനിപ്പിച്ചത്.
ഇതോടെ താരത്തിന് ബംഗ്ലാവും ഫെരാരി കാറും ഉള്പ്പെടെ വില്ക്കേണ്ടി വന്നിരുന്നു. പാലി ഹില്ലിലെ ബംഗ്ലാവ് വിറ്റ താരം നിലവില് ബാന്ദ്രയില് ഒരു അപ്പാര്ട്ട്മെന്റിലാണ് താമസിക്കുന്നത്. തന്റെ ഫെരാരി കാറും വിറ്റ ഇമ്രാന് അനന്തിരവള് ആയ ഇറ ഖാന്റെ വിവാഹത്തിന് എത്തിയത് ശ്രദ്ധ നേടിയിരുന്നു.
10 വര്ഷം മുമ്പ് ഉപയോഗിച്ചിരുന്ന സ്യൂട്ട് അണിഞ്ഞായിരുന്നു ഇമ്രാന് എത്തിയത്. തന്റെ മകള് ഇമാറയ്ക്ക് വേണ്ടി താന് മാറിയതിനെ കുറിച്ച് സംസാരിച്ചിരിക്കുകയാണ് ഇമ്രാന് ഇപ്പോള്. ”2016ല് ഞാന് താഴേക്ക് പോയി, തകര്ന്നതായി തോന്നി. ഭാഗ്യവശാല് എനിക്ക് സാമ്പത്തികമായി നേട്ടം ഉണ്ടാക്കാനായ വ്യവസായത്തില് ആയിരുന്നു ഞാന് ജോലി ചെയ്തിരുന്നത്.”
”അതിനാല് 30 വയസ് ആയപ്പോഴും പണത്തെ കുറിച്ച് ആലോചിച്ച് വിഷമിക്കേണ്ടി വന്നില്ല. ആ സമയത്ത് എന്റെ കരിയറിനായി കഠിനാധ്വാനം ചെയ്യാന് ഞാന് തയാറായിരുന്നില്ല. മെല്ലെ മെല്ലെ എല്ലാം അവസാനിച്ചു. ഒരു പിതാവ് ആയപ്പോഴാണ് ഞാന് ഗൗരവമായി എടുക്കാന് തുടങ്ങിയത്.”
”മകള് ഇമാറയ്ക്ക് മുന്നില് ഏറ്റവും നല്ല അച്ഛനാകാന് ആഗ്രഹിച്ചു. ഇനി അഭിനയിക്കുക എന്നത് ഒരു ജോലി അല്ലെന്ന് തീരുമാനിച്ചു. മകള്ക്കായി എനിക്ക് സ്വയം നന്നാകേണ്ടി വന്നു” എന്നാണ് ഇമ്രാന് ഖാന് പറയുന്നത്. അവന്തിക മാലിക് ആയിരുന്നു ഇമ്രാന്റെ ഭാര്യ. ഇരുവരും പിന്നീട് വേര്പിരിഞ്ഞു. ഈ ബന്ധത്തിലാണ് ഇമാറ ജനിച്ചത്.