നിരവധി താരങ്ങളാണ് ‘സിങ്കം എഗെയ്ന്’ സിനിമയില് വേഷമിടുന്നത്. നവംബര് ഒന്നിന് തിയേറ്ററുകളിലെത്തുന്ന ചിത്രത്തില് അജയ് ദേവ്ഗണിനൊപ്പം ദീപിക പദുക്കോണ്, അക്ഷയ് കുമാര്, കരീന കപൂര്, രണ്വീര് സിംഗ്, അര്ജുന് കപൂര് തുടങ്ങി നിരവധി താരങ്ങളാണ് വേഷമിടുന്നത്. ചിത്രത്തിന്റെ ഷൂട്ടിംഗിനിടെ തന്റെ കണ്ണിന് പരിക്കേറ്റതിനെ കുറിച്ച് വെളിപ്പെടുത്തിയിരിക്കുകയാണ് അജയ് ദേവ്ഗണ്.
കട്ടിയുള്ള കൂളിങ് ഗ്ലാസ് ധരിച്ചാണ് അജയ് ദേവ്ഗണ് ബിഗ് ബോസ് വേദിയിലെത്തിയത്. കണ്ണ് വീങ്ങിയിരിക്കുന്നതായി ശ്രദ്ധയില്പ്പെട്ട സല്മാന്, ഇക്കാര്യം താരത്തോട് ചോദിക്കുകയായിരുന്നു. ആക്ഷന് സീക്വന്സിനിടെ കണ്ണില് അടിയേല്ക്കുകയും തുടര്ന്ന് സാരമായ പരിക്ക് പറ്റിയെന്നും അജയ് മറുപടി നല്കി. പിന്നാലെ ചെറിയ സര്ജറി നടത്തേണ്ടി വന്നു.
രണ്ട്-മൂന്ന് മാസത്തേക്ക് ഒന്നും കാണാന് കഴിയുമായിരുന്നില്ല. എന്നാല് ഇപ്പോള് നല്ല ഭേദമുണ്ടെന്നും അദ്ദേഹം വ്യക്തമാക്കി. ഇതിന് മറുപടിയായി സംഘട്ടന രംഗങ്ങള് ചെയ്യുമ്പോള് ഇതെല്ലാം സാധാരണമാണെന്ന് സല്മാന് ചിരിച്ചുകൊണ്ട് പറഞ്ഞു.
അതേസമയം, രോഹിത് ഷെട്ടി ഒരുക്കുന്ന സിങ്കം എഗെയ്ന്, സംവിധായകന്റെ കോപ് യൂണിവേഴ്സില് പെടുന്ന ചിത്രമാണ്. ഇതുവരെ നാല് ചിത്രങ്ങളാണ് കോപ് യൂണിവേഴ്സ് ഫ്രാഞ്ചെസിയില് എത്തിയിട്ടുള്ളത്. ‘സിങ്കം’, ‘സിങ്കം റിട്ടേണ്സ്’, ‘സിംബ’, ‘സൂര്യവംശി’ എന്നീ ചിത്രങ്ങളാണ് രോഹിത് ഷെട്ടിയുടെ സംവിധാനത്തില് കോപ് യൂണിവേഴ്സ് സിനിമകള്.
സിങ്കം എഗെയ്ന് ചിത്രത്തില് ജാക്കി ഷ്രോഫ്, ദയാനന്ദ് ഷെട്ടി, ശ്വേത തിവാരി, രവി കിഷന് എന്നിവരും അഭിനയിക്കുന്നുണ്ട്. ദംബങ് സിനിമയിലെ ഛുല്ബുല് പാണ്ഡെയായി സല്മാന് ഖാന് അതിഥിവേഷത്തില് എത്തിയേക്കും എന്നും റിപ്പോര്ട്ടുണ്ട്.