യഷ് രാജ് ഫിലിംസ് ഒരുക്കുന്ന പുതിയ വെബ് സീരീസിൽ നായികമാരായി കീർത്തി സുരേഷും രാധിക ആപ്തെയും എത്തുന്നു. റിവഞ്ച് ത്രില്ലർ ജോണറിൽ ഒരുങ്ങുന്ന സീരീസ് നവാഗതനായ ധർമരാജ് ഷെട്ടിയാണ് സംവിധാനം ചെയ്യുന്നത്.
അക്ക എന്നാണ് സീരീസിന് പേരിട്ടിരിക്കുന്നത്. കീർത്തിയും രാധികയും സ്ക്രീനിൽ നേർക്കുനേർ നിൽക്കുന്ന കഥാപാത്രങ്ങളെയായിരിക്കും സീരീസിൽ അവതരിപ്പിക്കുക എന്നാണ് റിപോർട്ടുകൾ.
ഒടിടി മേഖലയിൽ കീർത്തി സുരേഷിന്റെ അരങ്ങേറ്റമായിരിക്കും അക്ക. വരുൺ ധവാനുമായുള്ള ‘തെറി’ റീമേക്കിന് ശേഷമുള്ള രണ്ടാമത്തെ ഹിന്ദി പ്രൊജക്റ്റാണ് ഇത്. തമിഴ്, തെലുങ്ക്, മലയാളം സിനിമകളിലെ പ്രകടനത്തിന് ശേഷം താരം ഇപ്പോൾ ബോളിവുഡിലേക്ക് ചുവടു വച്ചിരിക്കുകയാണ്.
അതേസമയം, സേക്രഡ് ഗെയിംസ്, ഖോൾ, ഓകെ കമ്പ്യൂട്ടർ തുടങ്ങിയ ഒന്നിലധികം വെബ് ഷോകളിൽ രാധിക ആപ്തെ ഇതിനകം അഭിനയിച്ചിട്ടുണ്ട്. യഷ് രാജ് ഫിലിംസുമായുള്ള രാധികയുടെ ആദ്യ കൂട്ടുകെട്ടായിരിക്കും ഈ ആക്ഷൻ-പാക്ക് സീരീസ്. ബദ്ലാപൂർ, അന്ധാദുൻ, രാത് അകേലി ഹേ തുടങ്ങിയ നിരവധി നിരൂപക പ്രശംസ നേടിയ സിനിമകൾ രാധികയുടെ ക്രെഡിറ്റിൽ ഉണ്ട്.
ബോളിവുഡിലെ മുൻനിര നിർമ്മാണ കമ്പനിയാണ് യഷ് രാജ് ഫിലിംസ്. ഈയിടെയാണ് വൈആർഎഫ് എന്റർടെയ്ൻമെന്റ്സിന്റെ ആദ്യ ഒടിടി പ്രൊജക്ട് ‘ദി റെയിൽവേ മെൻ’ റിലീസിനെത്തിയത്. ആർ മാധവൻ, കേ കേ മേനോൻ, ദിവ്യേന്ദു ശർമ്മ, ബാബിൽ ഖാൻ എന്നിവരാണ് സീരീസിൽ കേന്ദ്ര കഥാപാത്രങ്ങളെ അവതരിപ്പിച്ചത്.
വാണി കപൂർ, സുർവീൻ ചൗള, വൈഭവ് രാജ് ഗുപ്ത, തുടങ്ങിയവർ അഭിനയിക്കുന്ന മണ്ഡാല മർഡേഴ്സ് ആണ് നിലവിൽ നിർമ്മാണത്തിലുള്ള യഷ് രാജ് ഫിലിംസിന്റെ മറ്റൊരു സീരീസ്.