പി.എസ്‌.സി റാങ്ക് ലിസ്റ്റില്‍ പേരുണ്ടായിട്ടും കമ്മീഷൻ ലിസ്റ്റ് റദ്ദാക്കിയ മോനോവിഷമത്തിൽ യുവാവ് ആത്മഹത്യചെയ്ത സംഭവം വിവാദമായിരിക്കെ, യുവാവിനെ അധിക്ഷേപിച്ച് മോഡല്‍ രശ്മി ആര്‍ നായര്‍. “28 വയസ്സായിട്ടും പണിക്കൊന്നും പോകാതെ പിഎസ്‌സി റാങ്ക് ലിസ്റ്റും നോക്കി ഇരിക്കുന്നവരൊക്കെ ആത്മഹത്യ ചെയ്യുന്നതാണ് നല്ലത്” എന്നാണ് രശ്മി ആര്‍ നായർ തന്റെ ഫേസ്ബുക്കിൽ കുറിച്ചത്. ‘പാര്‍ട്ടിക്ക് വേണ്ടി ഇത്ര ക്രൂരമായി ന്യായീകരിക്കരുത്’ എന്ന് ഒരാൾ കുറിപ്പിന് താഴെ കമന്റ് ചെയ്തപ്പോൾ ‘പണിയെടുക്കാന്‍ വയ്യാത്തവര്‍ക്ക് വേറെ പാര്‍ട്ടിയും ഉണ്ടോ?’ എന്നായിരുന്നു രശ്മി ആര്‍ നായരുടെ പ്രതികരണം.
രശ്മി ആര്‍ നായരുടെ കുറിപ്പ്:
“28 വയസ്സായിട്ടും പണിക്കൊന്നും പോകാതെ പിഎസ്‌സി റാങ്ക് ലിസ്റ്റും നോക്കി ഇരിക്കുന്നവരൊക്കെ ആത്മഹത്യ ചെയ്യുന്നതാണ് നല്ലതെന്നാണ് എന്റെ ഒരിത്. ഒന്നാമതെ ഭൂമിയില്‍ ഓക്‌സിജന്‍ കുറവാണ് വെറുതെ എന്തിനാണ് അത് പാഴാക്കുന്നത്.”
വെള്ളറട തട്ടിട്ടമ്പലം സ്വദേശി അനു ആണ് ജോലി നഷ്ടപ്പെട്ട വേദനയില്‍ ആത്മഹത്യ ചെയ്തത്. “കുറച്ചു ദിവസമായി ആഹാരം വേണ്ട, ശരീരമൊക്കെ വേദനപോലെ. എന്തു ചെയ്യണമെന്നറിയില്ല, കുറച്ചു ദിവസമായി ആലോചിക്കുന്നു. ആരുടെ മുമ്പിലും ചിരിച്ചഭിനയിക്കാന്‍ വയ്യ. എല്ലാത്തിനും കാരണം ജോലി ഇല്ലായ്മ” എന്ന കുറിപ്പ് എഴുതിവച്ചിട്ടാണ് അനു ആത്മഹത്യ ചെയ്തത്. അനുവിന് കഴിഞ്ഞ എക്സൈസ് പരീക്ഷയില്‍ 77-ാം റാങ്ക് ലഭിച്ചിരുന്നു.