ഉപഭോക്താക്കളുടെ സ്വകാര്യ വിവരങ്ങള്‍ ചോര്‍ത്തിയതുമായി ബന്ധപ്പെട്ട് വന്‍ വിവാദത്തിലായിരുന്ന ഫെയ്‌സ്ബുക്കിന്റെ കുത്തക സ്വഭാവം വീണ്ടും പുറത്ത്. ഇത്തവണ ഇരയായിരിക്കുന്നത് കമ്പനി സ്ഥാപകന്‍ മാര്‍ക്ക് സക്കര്‍ബര്‍ഗും! ഫെയസ്ബുക്ക് സ്ഥാപകനായ സക്കര്‍ബര്‍ഗിന്റെ ചില മുന്‍കാല പോസ്റ്റുകള്‍ അബദ്ധത്തില്‍ ഡിലീറ്റ് ആയെന്ന് ലോകത്തിലെ ഏറ്റവും വലിയ സോഷ്യല്‍ മീഡിയ കമ്പനിയായ ഫെയസ്ബുക്ക് അറിയിച്ചു.
2007,08 വര്‍ഷത്തില്‍ സക്കര്‍ബര്‍ഗ് പങ്കുവെച്ച പോസ്റ്റുകളാണ് ഡിലീറ്റ് ആയിപ്പോയതെന്നാണ് കമ്പനി നല്‍കുന്ന വിശദീകരണം. സംഭവത്തിന് പിന്നില്‍ സാങ്കേതിക തകരാറാണെന്ന് പറയുന്നുണ്ടെങ്കിലും ഇക്കാര്യത്തില്‍ ഇതുവരെ വ്യക്തത വന്നിട്ടില്ലെന്നാണ് സൂചന. ഡിലീറ്റ് ചെയ്യപ്പെട്ട പോസ്റ്റുകള്‍ തിരിച്ചെടുക്കുന്നത് അതീവ ദുഷ്‌കരമാണെന്നും അതുകൊണ്ട് തന്നെ കമ്പനി അതിന് മുതിരുന്നില്ലെന്നും ഫെയ്സ്ബുക്ക് അറിയിച്ചു.
അപ്‌ഡേഷന്‍ വരുന്നതിന് അനുസരിച്ച പഴയ വെര്‍ഷനിലെ പോസ്റ്റുകള്‍ സേവ് ചെയ്യപ്പെടുന്നതുമായി ബന്ധപ്പെട്ട അല്‍ഗോരിതങ്ങളില്‍ മാറ്റം വരുന്നതിനാല്‍ ഡിലീറ്റ് ചെയ്യപ്പെട്ടവ കണ്ടെത്തുക പ്രയാസമാണെന്നാണ് ഫെയസ്ബുക്കിന്റെ നിലപാട്. അതേസമയം, എത്ര പോസ്റ്റുകള്‍ ഡിലീറ്റ് ചെയ്യപ്പെട്ടിട്ടുണ്ട് എന്നകാര്യത്തിലും കമ്പനിക്ക് വ്യക്തതയില്ല.