മഹാരാഷ്ട്രാ തിരഞ്ഞെടുപ്പ് പ്രചരണത്തിനിടെ നടത്തിയ ആള്‍ ഇന്ത്യ മജ്‌ലിസെ ഇത്തിഹാദുല്‍ മുസ്ലിമീന്‍ (എ.ഐ.എം.ഐ.എം) പാര്‍ട്ടി നേതാവും എംപിയുമായ അസദുദ്ദീന്‍ ഒവൈസിയുടെ ഡാന്‍സ് വൈറലായി. ഔറംഗാബാദിലെ പൈഠാന്‍ ഗേറ്റിലെ പ്രചാരണ പരിപാടിക്കിടെയാണ് ഒവൈസി ചുവടുകള്‍ വെച്ചത്. വേദിയില്‍നിന്ന് താഴേക്ക് ഇറങ്ങുന്നതിനിടെ പടിയില്‍വെച്ചായിരുന്നു ഒവൈസിയുടെ പ്രകടനം.
കഴിഞ്ഞ ദിവസം വാര്‍ത്താ ഏജന്‍സിയായ എ.എന്‍.ഐ യാണ് ഒവൈസിയുടെ ഈ വീഡിയോ പുറത്തു വിട്ടത്. നിമിഷങ്ങള്‍ക്കുള്ളില്‍ സോഷ്യല്‍ മീഡിയയില്‍ വൈറലായി.
എന്നാല്‍ താന്‍ ഡാന്‍സ് കളിച്ചതല്ലെന്നും തെരഞ്ഞെടുപ്പ് പ്രചാരണത്തിന്റെ ഭാഗമായി തന്റെ പാര്‍ട്ടി ചിഹ്നമായ “പട്ടം” പറപ്പിക്കുന്നത് അഭിനയിച്ചു കാണിച്ചതാണെന്നും ഒവൈസി പറഞ്ഞു.
മഹാരാഷ്ട്രയിലെ 288 നിയമസഭാ സീറ്റുകളില്‍ 44 മണ്ഡലങ്ങളിലാണ് എ.ഐ.എം.ഐ.എം. മത്സരിക്കുന്നത്. ഒക്ടോബര്‍ 21 നാണ് മഹാരാഷ്ട്ര നിയമസഭാ തെരഞ്ഞെടുപ്പ് നടക്കുന്നത്.