കേരള ബ്ലാസ്‌റ്റേഴ്‌സുമായി നാളെ നടക്കുന്ന മത്സരത്തില്‍ ഇയാന്‍ ഹ്യൂമിനെയും കെസിറോണ്‍ കിസിറ്റോയും പേടി സ്വപ്‌നമാണെന്ന് മുംബൈ പരിശീലകന്‍ അലക്സാന്ദ്ര ഗുയിമറെസ്. കേരള ബ്ലാസ്റ്റേഴ്‌സിനെ സ്വ്ന്തം തട്ടകത്ത് നേരിടാനൊരുങ്ങുന്നതിന് മുമ്പായി മാധ്യമ പ്രവര്‍ത്തകരോട് സംസാരിക്കുകയായിരുന്നു ഗുയിമറെസ്. ബ്ലാസ്റ്റേഴ്സിന്റെ പുതിയ സൈനിംഗ് ഉഗാണ്ടന്‍ താരം കിസിറ്റോയെ എടുത്ത് പറഞ്ഞ കോച്ച് ഹ്യൂമേട്ടന്റെ ഗോളടി മികവിനെ പുകഴ്ത്തി.ഹ്യൂം മികച്ച സ്ട്രൈക്കര്‍ ആണെന്നും ഏത് പ്രതിസന്ധിയെയും മറികടന്നു ഗോള്‍ നേടാനുള്ള ആത്മവിശ്വാസവും പോരാട്ട വീര്യവും ഹ്യൂമിനുണ്ടെന്നും തങ്ങള്‍ കരുതി ഇരിക്കുമെന്നും മുംബൈ പരിശീലകന്‍ വ്യക്തമാക്കി.
അതേസമയം, ഹോം മാച്ച് ആയതിനാല്‍ പൂര്‍ണ വിശ്വാസത്തില്‍ ആണ് മുംബൈ എന്നും സ്റ്റേഡിയം തങ്ങളുടെ കാണികളാല്‍ നിറയുമെന്നാണ് വിശ്വസിക്കുന്നെന്നും പരിശീലകന്‍ കൂട്ടിച്ചേര്‍ത്തു. കഴിഞ്ഞ മത്സരത്തില്‍ പരിക്കേറ്റ ഡിഫന്‍ഡര്‍ രാജു നാളെ ബ്ലാസ്റ്റേഴ്‌സിനെതിരേ ഇറങ്ങിയേക്കില്ലെന്നത് മുംബൈക്ക് തിരിച്ചടിയാകും. ജനുവരി ട്രാന്‍സ്ഫര്‍ വിന്‍ഡോയില്‍ പുതിയ സൈനിങ് ഉണ്ടാവില്ലെന്നും അദ്ദേഹം പറഞ്ഞു.
കൊച്ചിയില്‍ നടന്ന അദ്യ പാദത്തില്‍ ഇരുടീമുകളും 1-1നു സമനില പാലിച്ചിരുന്നു. എന്നാല്‍ ഇന്ന് ബ്ലാസ്റ്റേഴ്സിന്റെ കോച്ചും സാഹചര്യവും മാറിക്കഴിഞ്ഞു. കേരള ബ്ലാസ്റ്റേഴ്സ് പുതിയ പരിശീലകന്‍ ഡേവിഡ് ജെയിംസിന്റെ കീഴില്‍ തോല്‍വി അറിയാതയാണ് മുംബൈയ്ക്കെതിരെ ഇറങ്ങുന്നത്.
മറുവശത്ത് ഡിസംബര്‍ 17നു എ.ടി.കെയോട് 0-1നു തോറ്റതിനു ശേഷം കഴിഞ്ഞ മൂന്നു മത്സരങ്ങളിലും മുംബൈയ്ക്ക് തോല്‍വി അറിയേണ്ടി വന്നിട്ടി ല്ല. നോര്‍ത്ത് ഈസറ്റിനെതിരെ 2-0നും ഡല്‍ഹി ഡൈനാമോസിനെതിരെ 4-0നും വിജയിച്ചിരുന്നു. ഏറ്റവും ഒടുവില്‍ ജാംഷെഡ്പൂരിനെതിരെ നടന്ന മത്സരത്തില്‍ 2-2നു സമനില പങ്കിട്ട ശേഷമാണ് മുംബൈ ഹോം ഗ്രൗണ്ടില്‍ ഇന്ന് കേരള ബ്ലാസറ്റേഴ്സിനെ എതിരിടാന്‍ ഒരുങ്ങിയിരിക്കുന്നത്.