വിജയവഴിയിൽ തിരിച്ചെത്താൻ കേരളാ ബ്ലാസ്റ്റേഴ്സ് ഇന്നിറങ്ങും. പട്ടികയിൽ ഏറ്റവും പിന്നിലുള്ള നോർത്ത് ഈസ്റ്റ് യുണൈറ്റഡ് ആണ് എതിരാളികൾ. വൈകീട്ട് ഏഴരയ്ക്ക് ഗുവാഹത്തിയിലാണ് മത്സരം. ബ്ലാസ്റ്റേഴ്സ് താരങ്ങളെല്ലാം മത്സരത്തിന് പൂർണ സജ്ജരാണെന്ന് കോച്ച് ഇവാൻ വുകോമനോവിച്ച് പറഞ്ഞു.
നാല് മത്സരങ്ങൾ പൂർത്തിയാക്കുമ്പോൾ കേരള ബ്ലാസ്റ്റേഴ്സിന് ജയിക്കാനായത് ഒരു മത്സരം മാത്രമാണ് ജയിക്കാനായത്. അതെ സമയം നോർത്ത് ഈസ്റ്റിന് ഒരു മത്സരത്തിൽ പോലും ജയിക്കാൻ സാധിച്ചിട്ടില്ല. പ്രതിരോധമാണ് കേരള ബ്ലാസ്റ്റേഴ്സിന് ഈ സീസണിലെ ഏറ്റവും വലിയ തലവേദനയെങ്കിൽ നോർത്ത് ഈസ്റ്റിന് മുഴുവൻ പ്രശ്നങ്ങളാണ്.
കഴിഞ്ഞ സീസണിലെ ഏറ്റവും സന്തുലിത ടീമിൽ നിന്നും ഗോൾ അടിക്കാൻ കഷ്ടപ്പെടുന്ന ടീമിലേക്ക് ബ്ലാസ്റ്റേഴ്സ് എത്തിയിരിക്കുന്നു. എന്താണ് സംഭവിച്ചതെന്ന് അവർക്ക് തന്നെ അറിയാൻ പാടില്ലാത്ത അവസ്ഥയാണ്. വ്യക്തികത മികവിനെ കൂടുതലായി ആശ്രയിക്കേണ്ട ഗതിയിലേക്ക് ടീമിന്റെ അവസ്ഥ എത്തിയിരിക്കുന്നു.
3 ഗോളുകൾ സ്വന്തം പേരിൽ കുറിച്ച ഇവാൻ കല്യൂഷ്നി തന്നെ ടീമിന്റെ കുന്തമുന. അഡ്രിയൻ ലൂണയ്ക്കൊപ്പം മലയാളി താരങ്ങളായ കെ.പി. രാഹുലും സഹൽ അബ്ദുൽ സമദും അവസരത്തിനൊത്ത് ഉയരാനാൽ ബ്ലാസ്റ്റേഴ്സ് വിജയവഴിയിൽ തിരിച്ചെത്തും.
ഓൾ ഔട്ട് അറ്റാക്കിന് പോയാൽ പ്രതിരോധം തീരുമെന്ന അവസ്ഥയിൽ നിന്ന് ബ്ലാസ്റ്റേഴ്സ് കരകയറിയ മതിയാകു.