മുൻ ഷെഫീൽഡ് യുണൈറ്റഡ് ഡിഫൻഡർ ജോർജ് ബാൽഡോക്ക് അന്തരിച്ചു. ബാൽഡോക്കിന്റെ മരണവർത്തയിൽ ഗ്രീക്ക് ഫുട്ബോൾ സമൂഹം ഞെട്ടലിലാണ്. ബാൽഡോക്കിൻ്റെ പെട്ടെന്നുള്ള മരണവാർത്ത രാജ്യത്തെ ദുഃഖത്തിൽ ആഴ്ത്തി. വ്യാഴാഴ്ച രാത്രി ഇംഗ്ലണ്ടിനെ നേരിടാനിരിക്കെ, നിലവിൽ ലണ്ടനിലുള്ള ഗ്രീക്ക് ദേശീയ ടീമിലെ അംഗങ്ങൾ ദുരന്ത വാർത്ത വിശ്വസിക്കാൻ പാടുപെടുകയാണ്. ബാൽഡോക്ക് ഗ്രീസിനായി 12 മത്സരങ്ങൾ കളിച്ചിട്ടുണ്ട്. 2023 മാർച്ചിൽ ജോർജിയക്കെതിരെയായിരുന്നു അദ്ദേഹത്തിൻ്റെ അവസാന മത്സരം.
ഇംഗ്ലണ്ടിനെതിരെ കറുത്ത ബാൻഡ് ധരിക്കാനും മത്സരത്തിന് മുമ്പ് ഒരു മിനുട്ട് നിശബ്ദത പാലിക്കാനും ഗ്രീക്ക് ടീം യുവേഫയോട് ആവശ്യപ്പെട്ടു. ബാൽഡോക്കിനെ കാണാതാവുകയും ഭാര്യ മണിക്കൂറുകളോളം തിരഞ്ഞുകൊണ്ടിരിക്കുകയും ചെയ്തതിന് ശേഷം ബാൽഡോക്ക് താമസിക്കുന്ന വീടിൻ്റെ ഉടമയുമായി ബന്ധപ്പെട്ടു. അദ്ദേഹമാണ് 31 കാരനായ കളിക്കാരൻ്റെ മൃതദേഹം പൂളിനുള്ളിൽ കണ്ടെത്തിയത്. ഗ്രീക്ക് പോലീസിൻ്റെ ഔദ്യോഗിക പ്രസ്താവന വ്യാഴാഴ്ച പ്രതീക്ഷിക്കുന്നു – എന്നാൽ ഫൗൾ പ്ലേയുടെ സൂചനകളൊന്നുമില്ലെന്ന് പോലീസിനുള്ളിലെ വൃത്തങ്ങൾ പറയുന്നു. ഏതാനും ദിവസങ്ങൾക്കുള്ളിൽ പോസ്റ്റ്‌മോർട്ടം നടത്തി മരണകാരണം വ്യക്തമാകും.
ഇംഗ്ലീഷ് ഫുട്ബോൾ ലീഗ് ഒരു പ്രസ്താവനയിൽ പറഞ്ഞു: “ഷെഫീൽഡ് യുണൈറ്റഡ്, ഓക്‌സ്‌ഫോർഡ് യുണൈറ്റഡ്, നോർത്താംപ്ടൺ ടൗൺ, എംകെ ഡോൺസ് എന്നിവിടങ്ങളിൽ ലീഗിലുടനീളം സ്‌പെല്ലുകൾ കൊണ്ട് സ്വാധീനം ചെലുത്തിയ ജോർജ്ജ് ബാൽഡോക്ക് എന്ന കളിക്കാരൻ്റെ വിയോഗത്തിൽ EFL വളരെ ദുഃഖിതരാണ്. “ഞങ്ങളുടെ ചിന്തകൾ അദ്ദേഹത്തിൻ്റെ കുടുംബം, സുഹൃത്തുക്കൾ, മുൻ സഹപ്രവർത്തകർ എന്നിവർക്കൊപ്പമാണ്.” പ്രസ്താവന കൂട്ടിച്ചേർത്തു.
“ഈ ദുഖകരമായ സമയങ്ങളിൽ ഞങ്ങളുടെ ആത്മാർത്ഥമായ അനുശോചനം പങ്കിടാൻ ഞങ്ങൾ ആഗ്രഹിക്കുന്നു. നിങ്ങൾ എപ്പോഴും ഞങ്ങളിൽ ഒരാളായിരിക്കും, ജോർജ്ജ്.” എംകെ ഡോൺസ് പുറത്ത് വിട്ട പ്രസ്താവനയിൽ പറയുന്നു.