ഐപിഎല്ലില് ശക്തമായ താരനിരയുള്ള ടീമാണ് റോയല് ചലഞ്ചേഴ്സ് ബാംഗ്ലൂര്. ലോക ഒന്നാം നമ്പര് താരമായ വിരാട് കോഹ്ലി നായകനായി ഇരുന്നിട്ട് പോലും ഒരു തവണ പോലും ജേതാക്കളാകാനായില്ല. ഓരോ സീസണിലും ഈ സാല കപ്പ് നമുക്ക് എന്ന് പറയുകയല്ലാതെ പ്രയോജനമൊന്നുമുണ്ടായിട്ടില്ല. ഇപ്പോഴിതാ ആര്സിബിക്ക് എന്തുകൊണ്ട് ഒരു കിരീടം പോലുമില്ല എന്നതിന്റെ കാരണത്തിലേക്ക് വിരല് ചൂണ്ടിയിരിക്കുകയാണ് ആര്സിബി മുന് താരം യൂണിവേഴ്സല് ബോസ് ക്രിസ് ഗെയ്ല്.
ആര്സിബി മികച്ച താരങ്ങളുടെ നിരയാണ്. എന്നാല് മൂന്ന് താരങ്ങളിലേക്കായി അവരുടെ ശ്രദ്ധ ഒതുങ്ങുകയാണ്. ഞാനും വിരാട് കോഹ്ലിയും എബി ഡിവില്ലിയേഴ്സും മാത്രമാണ് ശ്രദ്ധ നേടിയവര്. മാനസികമായി ശക്തരായ നിരവധി താരങ്ങള് അവര്ക്കുണ്ട്. എന്നാല് അവര്ക്ക് പ്രാധാന്യം ലഭിക്കുന്നില്ല. ഇതാണ് ആര്സിബി കിരീടം നേടാത്തതിന്റെ പ്രധാന കാരണമായി എനിക്ക് തോന്നുന്നത്- ഗെയ്ല് പറഞ്ഞു.
ടീമിന്റെ കിരീട ദാഹത്തില് മനസ് മടുത്ത് കോഹ്ലി നായകസ്ഥാനം വിട്ടിരുന്നു. പിന്നാലെ ഫഫ് ഡുപ്ലെസിസിനെ ആര്സിബി നായകനാക്കി. മികച്ച നിരയുമായിട്ടാണ് ഇത്തവണയും ആര്സിബി എത്തുന്നത്. അതിനാല് തന്നെ എല്ലാത്തവണത്തെയും പോലെ ഇത്തവണയും അവര് കിരീട പ്രതീക്ഷയിലാണ്.
ശക്തമായ ബാറ്റിംഗ് നിര എന്നും ആര്സിബിയ്ക്ക് സ്വന്തമാണ്. എന്നാല് ബോളിംഗിലാണ് ടീമിന് കാലിടറുന്നത്. വിരാട് കോഹ്ലി, ഫാഫ് ഡുപ്ലെസിസ്, രജത് പാടിധാര്, ഗ്ലെന് മാക്സ്വെല്, മിച്ചല് ബ്രേസ്വല്, ഫിന് അലന് തുടങ്ങിയവരെല്ലാമാണ് ബാറ്റിംഗ് കരുത്ത്. മുഹമ്മദ് സിറാജ്, ഹര്ഷല് പട്ടേല്, റീസെ ടോപ്ലി, ഡേവിഡ് വില്ലി, ജോഷ് ഹെയ്സല്വുഡ് എന്നിവരാണ് പ്രധാന ബോളര്മാര്.