ദക്ഷിണാഫ്രിക്കയ്ക്കെതിരായ പരമ്പര തോറ്റതിന് പിന്നാലെ നടത്തിയ പത്രസമ്മേളനത്തില്‍ മാധ്യമപ്രവര്‍ത്തകനോട് കയര്‍ത്ത് സംസാരിച്ച് നായകന്‍ വിരാട് കോഹ്ലി. ഇന്ത്യയുടെ ടീം സെലക്ഷനെക്കുറിച്ചും വിദേശപര്യടനങ്ങളിലെ പരാജയങ്ങളെക്കുറിച്ചും മാധ്യമപ്രവര്‍ത്തകന്‍ ചോദിച്ചപ്പോഴാണ് കോഹ്ലിയുടെ നിയന്ത്രണം വിട്ടത്.
“”ഏതാണ് ആ ബെസ്റ്റ് ഇലവന്‍, നിങ്ങള്‍ പറയൂ, അതിനനുസരിച്ച് ഞാന്‍ കളിക്കാം”” എന്നായിരുന്നു ടീമില്‍ മാറ്റംവരുത്തുന്നതിനെക്കുറിച്ചുള്ള ചോദ്യത്തിന് കോഹ്ലിയുടെ മറുപടി
കഴിഞ്ഞ 30 ടെസ്റ്റുകളില്‍ ഇന്ത്യ ജയിച്ചതിന്റെ കണക്ക് പറഞ്ഞ കോഹ്ലിയോട് കൂടുതല്‍ വിജയവും ഇന്ത്യയില്‍ നിന്നല്ലേ എന്നായിരുന്നു മാധ്യമപ്രവര്‍ത്തകന്റെ ചോദ്യം. എന്നാല്‍ എവിടെയാണ് കളിക്കുന്നത് എന്ന് ഞങ്ങള്‍ നോക്കാറില്ലെന്ന് പറഞ്ഞു ഒഴിഞ്ഞുമാറിയ കോഹ്ലി, നിങ്ങളുടെ ചോദ്യങ്ങള്‍ക്ക് ഉത്തരംപറയാനാണ് ഞാനിവിടെ ഇരിക്കുന്നതെന്നും അല്ലാതെ നിങ്ങളുമായി വഴക്കിടാനല്ലെന്നും പറഞ്ഞു. എന്നാല്‍ മറ്റൊരു ചോദ്യത്തിന് ഉത്തരംപറയവെ, ദക്ഷിണാഫ്രിക്ക ഇന്ത്യയില്‍ എത്രകളികളില്‍ ജയിച്ചുവെന്നതിന്റെ കണക്കെടുക്കാനാവുമോ എന്നും കോഹ്ലി തിരിച്ച് ചോദിച്ചു.