ഞായറാഴ്ച പാക്കിസ്ഥാനെതിരായ ഏഷ്യാ കപ്പ് സൂപ്പർ 4 പോരാട്ടത്തിൽ ക്യാപ്റ്റൻ രോഹിത് ശർമ്മ പുറത്തായ രീതിയിൽ നിരാശ പ്രകടിപ്പിച്ച മുൻ ഇന്ത്യൻ ക്രിക്കറ്റ് താരം ഗൗതം ഗംഭീർ. വളരെ പതുക്കെ സ്കോർ ചെയ്തുതുടങ്ങിയ രോഹിത് പിന്നെ ടോപ് ഗിയറിൽ എത്തുക ആയിരുന്നു. പാകിസ്ഥാൻ ബോളറുമാരെ കശക്കിയെറിഞ്ഞ് അർദ്ധ സെഞ്ചുറിയും കളിച്ച് മുന്നേറിയ താരം അനാവശ്യ ഷോട്ട് കളിച്ചാണ് പുറത്തായത്. താരം 58 റൺസാണ് നേടിയത്. അനാവശ്യ ഷോട്ട് കളിച്ച് രോഹിത് വീണതാണ് ഗൗതം ഗംഭീറിനെ ചൊടിപ്പിച്ചത്.
“അവൻ അങ്ങേയറ്റം നിരാശനാകുമെന്ന് എനിക്ക് തോന്നുന്നു. രോഹിത് ശർമ്മ പുറത്തായ രീതി വളരെ മോശം ഷോട്ടായിരുന്നു. ആ ഘട്ടത്തിൽ പാകിസ്ഥാൻ വളരെ മോശം നിലയിൽ ആയിരുന്നു. അതിനാൽ തന്നെ രോഹിത് കാണിച്ചത് മണ്ടത്തരമായിപ്പോയി” സ്റ്റാർ സ്പോർട്സിലെ ഒരു ദിവസത്തെ കളി അവലോകനം ചെയ്യവേ ഗംഭീർ പറഞ്ഞു.
രോഹിത് പുറത്തായതിന് ശേഷം ഓപ്പണിംഗ് പങ്കാളിയായ ശുഭ്മാൻ ഗില്ലും അർദ്ധ സെഞ്ച്വറി നേടിയ ശേഷം പുറത്തായി. രണ്ട് ഓപ്പണർമാരും പെട്ടെന്നുള്ള സമയങ്ങളിൽ പുറത്തായതാണ് താരത്തെ ചൊടിപ്പിച്ചത്. “ഒരു ഘട്ടത്തിൽ, ഇന്ത്യ 370-375 സ്കോർ ചെയ്തേക്കുമെന്ന് തോന്നി. രോഹിത് ശർമ്മ ആ സമയം മോശം ഷോട്ട് കളിച്ചു, അടുത്ത ഓവറിൽ ശുഭ്മാൻ ഗിൽ പുറത്തായി. പാകിസ്ഥാനെപ്പോലെ ഒരു ബൗളിംഗ് ആക്രമണത്തിന് ഒരു ചെറിയ വിൻഡോ പോലും നൽകാൻ നിങ്ങൾ ശ്രമിക്കരുത്” ഗംഭീർ ഉറപ്പിച്ചു പറഞ്ഞു.
“നിങ്ങൾ ഒരു വിൻഡോ നൽകി, 2 ഓവറിൽ 30 റൺസ് അടിച്ച ബൗളർക്കെതിരെ ആ ഷോട്ട് കളിച്ചു. നന്നായി ബൗൾ ചെയ്യുന്ന ഒരു ബൗളറായിരുന്നുവെങ്കിൽ, നിങ്ങൾ സമ്മർദ്ദത്തിലായതിനാൽ കുഴപ്പമില്ല. എന്നാൽ ഷദാബ് അത്ര മികച്ച ഫോമിൽ അല്ല എറിഞ്ഞത് എന്നതും ശ്രദ്ധിക്കണം.” ഗംഭീർ പറഞ്ഞു.
അതേസമയം ഇന്നലെ റിസർവ് ദിനത്തിലേക്ക് നീണ്ട മത്സരത്തിൽ 228 റൺസിൻറെ കൂറ്റൻ ജയമാണ് ഇന്ത്യ സ്വന്തമാക്കിയത്. 357 റൺസ് വിജയലക്ഷ്യം പിന്തുടർന്ന പാകിസ്ഥാൻ 32 ഓവറിൽ 128 റൺസിന് ഓൾ ഔട്ടായി. കെ.എൽ രാഹുൽ. വിരാട് കോഹ്ലി എന്നിവരുടെ മികച്ച പ്രകടനമാണ് ഇന്ത്യയെ കൂറ്റൻ സ്കോറിൽ എത്തിച്ചത്. 27 റൺസെടുത്ത ഫഖർ സമനും 23 റൺസ് വീതമെടുത്ത അഗ സൽമാനും ഇഫ്തിഖർ അഹമ്മദും 10 റൺസെടുത്ത ബാബർ അസമും മാത്രമാണ് പാക് നിരയിൽ രണ്ടക്കം കടന്നത്. കുൽദീപ് 5 വിക്കറ്റും താക്കൂർ, ഹാർദിക്, ബുംറ എന്നിവർ ഓരോ വിക്കറ്റും വീഴ്ത്തി.