യുവതാരം സര്ഫറാസ് ഖാനെ ഇന്ത്യന് ടീമിലേക്കു കൊണ്ടുവരാന് വൈകിയതില് ബിസിസിഐക്കെതിരേ ആഞ്ഞടിച്ച് സുനില് ഗവാസ്കര്. ന്യൂസിലാന്ഡുമായുള്ള ആദ്യ ടെസ്റ്റിലെ താരത്തിന്റെ പ്രകടനം ചൂണ്ടിക്കാട്ടിയാണ് ഗവാസ്കറുടെ വിമര്ശനം. അന്താരാഷ്ട്ര ക്രിക്കറ്റില് മെലിഞ്ഞ അരക്കെട്ട് അത്യാവശ്യമാണെന്നു കരുതുന്നവര് ഇന്ത്യന് ക്രിക്കറ്റിലെ തീരുമാനങ്ങളെടുക്കുന്നവരില് ഉണ്ടായതു കാരണമാണ് സര്ഫറാസിന്റെ വരവ് വൈകിയതെന്ന് ഗവാസ്കര് പരിഹസിച്ചു.
ബാറ്റുമായി മൈതാനത്തിലേക്കുള്ള സര്ഫറാസ് ഖാന്റെ മടങ്ങിവരവ് അവന്റെ അരക്കെട്ടിനേക്കാള് ഗംഭീരമായിരുന്നു. ഒരിക്കലും ഉള്ക്കൊള്ളാന് സാധിക്കാത്ത തരത്തിലുള്ള ഐഡിയകളുള്ള ഒരുപാട് തീരുമാനമെടുക്കുന്നയാളുകള് ഇന്ത്യന് ക്രിക്കറ്റിലുണ്ടെന്നതാണ് ഖേദകരമായ കാര്യം.
കഴിഞ്ഞ കുറച്ചു വര്ഷങ്ങളായി ഇന്ത്യന് ടീമില് സര്ഫറാസ് ഖാന് സ്ഥാനം നിഷേധിക്കപ്പെട്ടു കൊണ്ടിരിക്കുകയായിരുന്നു. ആഭ്യന്തര ക്രിക്കറ്റില് നൂറു കണക്കിനു റണ്സ് സ്കോര് ചെയ്തു കൊണ്ടിരുന്നിട്ടും അവനു അവസരങ്ങള് ഇന്ത്യ നല്കിയില്ല. അന്താരാഷ്ട്ര ക്രിക്കറ്റില് മെലിഞ്ഞ അരക്കെട്ട് വേണമെന്നത് അത്യാവശ്യമാണെന്നു കരുതുന്നവര് ഇന്ത്യന് ക്രിക്കറ്റിലെ തീരുമാനങ്ങളെടുക്കുന്നവരില് ഉണ്ടായതു കാരണമാണിത്.
മെലിഞ്ഞ അരക്കെട്ടില്ലാത്ത മറ്റൊരു ഇന്ത്യന് താരമാണ് റിഷഭ് പന്ത്. എന്നിട്ടും എത്ര വലിയ ഇംപാക്ടാണ് കളിക്കളത്തില് അദ്ദേഹത്തിന് ഉണ്ടാക്കാന് സാധിക്കുന്നത്. ഒരു ദിവസം മുഴുവന് വിക്കറ്റ് കൂടി കാക്കുന്നയാളാണ് റിഷഭെന്നതു മറക്കാന് പാടില്ല.
ആറു മണിക്കൂറോളം വിക്കറ്റിനു പിന്നില് കുനിഞ്ഞും നിവര്ന്നും നിന്നാല് മാത്രം പോരാ. ത്രോകള്ക്കായി സ്റ്റംപുകള്ക്കടുത്തേക്കു ഓടുകയും വേണം. അതുകൊണ്ടു തന്നെ ദയവു ചെയ്ത് ഈ യോ- യോ ടെസ്റ്റുകളെല്ലാം (ഫിറ്റ്നസ്) നിര്ത്തലാക്കണം.അതിനു പകരം ഒരു താരം മാനസികമായി എത്ര മാത്രം കരുത്തനാണെന്നു പരിശോധിക്കുകയാണ് വേണ്ടത്- ഗവാസ്കര് പറഞ്ഞു.