ടി20 ലോക കപ്പില്‍ ഇന്ത്യയുടെ ഗെയിം ചേഞ്ചറാകാന്‍ പോകുന്ന താരം സൂര്യകുമാര്‍ യാദവ് ആയിരിക്കുമെന്ന് വസീം അക്രം. സൂര്യകുമാര്‍ യാദവ് തന്റെ സ്വഭാവിക കളി പുറത്തെടുക്കണമെന്നും ആദ്യത്തെ ആറ് ഓവറുകള്‍ക്ക് ശേഷം കളി മാറ്റുക അവനായിരിക്കുമെന്നും വസീം അക്രം പറഞ്ഞു.
‘സൂര്യകുമാറില്‍ മികച്ചൊരു താരത്തെയാണ് ഇന്ത്യ കണ്ടെത്തിയിരിക്കുന്നത്. ആദ്യത്തെ ആറ് ഓവറുകള്‍ക്ക് ശേഷം കളി മാറ്റുക അവനായിരിക്കും. ഞാന്‍ അവന്റെ ഷോട്ടുകള്‍ കണ്ടിട്ടുണ്ട്. നേരത്തെ കെകെആറില്‍ അവന്‍ എന്റെ കൂടെയുണ്ടായിരുന്നു. ഒരു ക്രിക്കറ്റര്‍ എന്ന നിലയില്‍ അവന്‍ ഒരുപാട് മെച്ചപ്പെട്ടിട്ടുണ്ട്. അവന്റേതായ ഷോട്ടുകളാണ് കളിക്കുന്നത്. നില്‍ക്കുകയേയില്ല. തന്റെ കരിയറില്‍ കളിച്ചു വന്നത് പോലെ തന്നെ അവന്‍ കളിക്കണം.’
‘ഞാന്‍ ഇന്ത്യന്‍ ക്രിക്കറ്റിനെ അത്ര സൂക്ഷ്മമായി പിന്തുടരുന്നില്ല. എന്നാല്‍ വലിയ മത്സരങ്ങളൊക്കെ കാണുന്നുമുണ്ട്. ഓസ്ട്രേലിയയില്‍ ടെസ്റ്റ് പരമ്പര ജയിച്ചതും ഇംഗ്ലണ്ടിലെ പ്രകടനവുമെല്ലാം. ഇന്ത്യന്‍ ക്രിക്കറ്റ് ഉയരത്തിലാണെന്ന കാര്യത്തില്‍ യാതൊരു സംശയവുമില്ല. ഇതിനെല്ലാം കാരണം ആഭ്യന്തര ക്രിക്കറ്റില്‍ അവര്‍ നടത്തുന്ന നിക്ഷേപങ്ങളാണ്. അതുകൊണ്ടാണ് ഒരുപാട് യുവതാരങ്ങള്‍ ഉയര്‍ന്നു വരുന്നത്’ അക്രം വിലയിരുത്തി.
ഞായറാഴ്ച ചിരവൈരികളായ പാകിസ്ഥാനെതിരെയാണ് ലോക കപ്പിലെ ഇന്ത്യയുടെ ആദ്യമത്സരം. ഇന്ത്യന്‍ സമയം വൈകിട്ട് 7.30 മുതല്‍ ആരംഭിക്കുന്ന മത്സരത്തിന് ദുബായിയാണ് വേദിയാകുന്നത്. രണ്ട് സന്നാഹങ്ങളും അനായാസം ജയിച്ച് തികഞ്ഞ ആത്മവിശ്വാസത്തിലാണ് ഇന്ത്യ ഇറങ്ങുന്നത്.