ടീം ഇന്ത്യയുടെ ആ പേടിസ്വപ്നം യാഥാര്‍ത്ഥ്യമാകുന്നു. ഇന്ത്യയുടെ പേസ് കുന്തമുനയായ ജസ്പ്രീത് ബുംറ ടി20 ലോക കപ്പില്‍ കളിക്കുന്നത് സംശയത്തിലായിരിക്കുകയാണ്. നട്ടെല്ലിനേറ്റ പരിക്കാണ് താരത്തെ ഇന്ത്യയ്ക്ക് നഷ്ടപ്പെടുത്തുന്നത്. 2019-ല്‍ ബുംറയുടെ പദ്ധതികള്‍ പാളം തെറ്റിച്ച അതേ ഗുരുതരമായ പരിക്കാണ് വീണ്ടും വില്ലനായെത്തിയിരിക്കുന്നത്. ടി20 ലോക കപ്പിനുള്ള ടീമിനെ പ്രഖ്യാപിക്കാന്‍ ഒരു മാസം മാത്രം ശേഷിക്കെ ബിസിസിഐയും സെലക്ടര്‍മാരും ആശങ്കയിലാണ്.
‘അതെ, അത് ആശങ്കാജനകമാണ്. ലഭ്യമായ ഏറ്റവും മികച്ച ചികിത്സയാണ് അവന് നല്‍കുന്നത്. പ്രശ്‌നം അത് അദ്ദേഹത്തിന്റെ പഴയ പരിക്കാണ്, അതാണ് ആശങ്ക. ലോകകപ്പിന് ഇനി രണ്ട് മാസമേ ബാക്കിയുള്ളൂ, ഏറ്റവും മോശം സമയത്താണ് അദ്ദേഹത്തിന് ഈ പരിക്ക് പറ്റിയത്.’
‘ഞങ്ങള്‍ അദ്ദേഹത്തിന്റെ അവസ്ഥ സൂക്ഷ്മമായി നിരീക്ഷിച്ചുവരികയാണ്. ക്രിക്കറ്റിലെ ഏറ്റവും മികച്ച ബൗളറാണ് അദ്ദേഹം. അതിനാല്‍ തന്നെ ശ്രദ്ധാപൂര്‍വം കൈകാര്യം ചെയ്യേണ്ടതുണ്ട്.’ ഒരു മുതിര്‍ന്ന ബിസിസിഐ ഉദ്യോഗസ്ഥന്‍ പറഞ്ഞു.
താരത്തിന്റെ പരിക്ക് സാരമുള്ളത് തന്നെയാണെന്നാണ് ഇത് അര്‍ത്ഥമാക്കുന്നത്. പരിക്കിന്റെ പിടിയിലായതിനാല്‍ താരത്തെ എഷ്യാ കപ്പില്‍ നിന്നും നേരത്തെ ഒഴിവാക്കിയിരുന്നു. താരത്തിന് വരുന്ന ടി20 ലോക കപ്പും നഷ്ടപ്പെട്ടാല്‍ ഇന്ത്യയുടെ പദ്ധതികളെ അത് തകിടം മറിക്കുമെന്ന് ഉറപ്പാണ്.
ഓസ്‌ട്രേലിയൻ മണ്ണിൽ ബുംറ ഇല്ലാതെ ഇറങ്ങുന്നതിനെക്കുറിച്ച് ചിന്തിക്കാൻ പോലും ഇന്ത്യക്ക് ആകില്ല. അത്ര മികച്ച ഒരു ബൗളറെ നഷ്ടമായാൽ പകരം എന്ത് ചെയ്യും എന്ന ആശങ്ക ഇന്ത്യൻ ക്യാമ്പിലുണ്ട്. താരം അതിന് മുമ്പ് ഫിറ്റായി മടങ്ങി എത്തുമെന്നാണ് ഇന്ത്യൻ പ്രതീക്ഷ.