ഐസിസി ടി20 ലോക കപ്പിന്റെ ആദ്യ നാലില് ഇടംപിടിക്കാന് തന്റെ രാജ്യം ഇപ്പോഴും പോരാട്ടത്തിലാണെന്ന് വെസ്റ്റ് ഇന്ഡീസ് മുന് ക്യാപ്റ്റന് ഡാരന് സമി. രണ്ട് കളി തോറ്റതു കൊണ്ട് തങ്ങള് പുറത്തായെന്ന് അര്ത്ഥമില്ലെന്നും ശക്തമായി തന്നെ തിരിച്ചു വന്ന് സെമിയില് പ്രവേശിക്കുമെന്നും സമി പറഞ്ഞു.
‘ഞങ്ങള് എല്ലാവരും നിരാശരാണ്. നമ്മള് ആഗ്രഹിച്ച പോലെ ലോക കപ്പ് ആരംഭിക്കാനായില്ല. അതിനര്ത്ഥം നമ്മള് പുറത്താണെന്നല്ല. ഇപ്പോള് നമുക്ക് നിയന്ത്രിക്കാന് കഴിയുന്നത് നമ്മള് കളിക്കുന്ന രീതിയാണ്. ടീമില് ചില മാറ്റങ്ങല് വേണ്ടത് അത്യാവശ്യമാണ്. റോസ്റ്റണ് ചേസ് തീര്ച്ചയായും ടീമില് വരേണ്ടതുണ്ട്’ ഡാരന് സമി പറഞ്ഞു.
കളിക്കാര് ഒരു ടീമായി പരസ്പരം പിന്തുണച്ചും വരുന്ന കളികളില് വിജയിക്കണമെന്ന് ഡാരന് സമി കൂട്ടിച്ചേര്ത്തു. ടൂര്ണമെന്റ് ഉദ്ഘാടന മത്സരത്തില് ഇംഗ്ലണ്ടിനെതിരെ വെസ്റ്റ് ഇന്ഡീസ് നാണംകെട്ട തോല്വിയാണ് ഏറ്റുവാങ്ങിയത്. അവിടെ അവര് വെറും 55 റണ്സിന് ഓള്ഔട്ടായി. ദക്ഷിണാഫ്രിക്കയ്ക്കെതിരായ അടുത്ത മത്സരത്തില് നില മെച്ചപ്പെടുത്തിയെങ്കിലും വിജയം ഉറപ്പിക്കാന് അത് പര്യാപ്തമായില്ല.
ഇന്ന് ബംഗ്ലാദേശിനെതിരെയാണ് വിന്ഡീസിന്റെ മൂന്നാം മത്സരം. ഇന്ത്യന് സമയം 3.30 മുതലാണ് മത്സരം. ബംഗ്ലാദേശും കളിച്ച് മത്സരങ്ങളില് രണ്ടും തോറ്റ് പ്രതിസന്ധിയിലായതിനാല് അവര്ക്കും ജയം അനിവാര്യമാണ്.