രാജസ്ഥാന്‍ റോയല്‍സ് നായകന്‍ സഞ്ജു സാംസണെ വാനോളം പ്രശംസിച്ച് ഇംഗ്ലീഷ് സൂപ്പര്‍ താരം ജോ റൂട്ട്. സഞ്ജു അതുല്യ പ്രതിഭയാണെന്നും താരമെന്ന നിലയിലും നായകനെന്ന നിലയിലും സഞ്ജു അസാധ്യ വളര്‍ച്ചയാണ് കൈവരിക്കുന്നതെന്നും റൂട്ട് പറഞ്ഞു.
രാജസ്ഥാന്‍ റോയല്‍സിന്റെ അവസാന സീസണ്‍ വളരെ മനോഹരമായിരുന്നു. സഞ്ജുവിന്റെ ബാറ്റിങ് എല്ലാസമയത്തും വളരെയധികം ആസ്വദിക്കുന്നു. പ്രതിഭയുടെ വലിയ ഉറവിടമാണ് സഞ്ജു. അതുകൊണ്ടാണ് ഓരോ വര്‍ഷവും താരമെന്ന നിലയിലും നായകനെന്ന നിലയിലും സഞ്ജു അസാധ്യ വളര്‍ച്ച കൈവരിക്കുന്നത്.
രാജസ്ഥാനിലെ സാഹചര്യം കുടുംബം പോലെയാണ്. എല്ലാവരും ഈ അന്തരീക്ഷമാണ് ആഗ്രഹിക്കുന്നതും. വലിയ സ്വീകരണമാണ് എനിക്ക് ലഭിച്ചത്. ലേലത്തില്‍ എന്നെ സ്വന്തമാക്കാനായത് ടീമിന്റെ വലിയ നേട്ടമായി കാണുന്നുവെന്നാണ് അവര്‍ പറഞ്ഞത്. സീസണിലെ മത്സരങ്ങളെ പ്രതീക്ഷയോടെ നോക്കിക്കാണുന്നു. കുറച്ചുദിവസങ്ങള്‍ക്കുള്ളില്‍ രാജസ്ഥാന്‍ കുടുംബത്തിന്റെ ഭാഗമാവാന്‍ സാധിച്ചു.
മറ്റെവിടെയും ലഭിക്കാത്ത അനുഭവങ്ങളാണ് ഇവിടെയുള്ളത്. ഇത്തരം അനുഭവം എന്നെ സംബന്ധിച്ച് വളരെ പുതുമയുള്ളതാണ്. അന്താരാഷ്ട്ര ക്രിക്കറ്റില്‍ വലിയ അനുഭവസമ്പത്തുള്ള താരങ്ങള്‍ യുവതാരങ്ങളോടൊപ്പം ആസ്വദിച്ച് കളിക്കുന്നത് കാണാന്‍ സന്തോഷം. ഈ ടീമിന്റെ ഭാഗമാവാന്‍ സാധിച്ചതില്‍ വലിയ സന്തോഷം- ജോ റൂട്ട് പറഞ്ഞു.
രാജസ്ഥാന്‍ നിരയിലേക്ക് ഇത്തവണയെത്തിയ പ്രധാന താരങ്ങളിലൊരാളാണ് ജോ റൂട്ട്. താരത്തിന്റെ കന്നി ഐപിഎല്‍ സീസണാണിത്. ഇതിന് മുമ്പ് പലവട്ടം ഐപിഎല്ലില്‍ കളിക്കാന്‍ ആഗ്രഹിച്ചിരുന്നെങ്കിലും ആദ്യമായാണ് റൂട്ടിന് ഐപിഎല്ലിലേക്കുള്ള വിളിയെത്തുന്നത്.