ക്രിക്കറ്റിലെ എല്ലാ ഫോര്മാറ്റിലും ഐസിസി റാങ്കിംഗില് ഒന്നാമതെത്തി ടീം ഇന്ത്യ. ഓസ്ട്രേലിയയ്ക്കെതിരായ ആദ്യ ടെസ്റ്റിലെ തകര്പ്പന് വിജയത്തിന്റെ കരുത്തില് ടെസ്റ്റ് റാങ്കിംഗില് ഇന്ത്യ ഒന്നാം സ്ഥാനത്തേക്കു കുതിച്ചെത്തിയതോടെയാണ് എല്ലാ ഫോര്മാറ്റിലും ഇന്ത്യ സര്വ്വാധിപത്യം നേടിയത്.
ഇതോടെ ക്രിക്കറ്റില് ഒരേ സമയത്ത് ടെസ്റ്റ്, ഏകദിനം, ടി20 എന്നിവയില് ഒന്നാംസ്ഥാനത്തുള്ള ടീമിനെ നയിച്ച ആദ്യ ക്യാപ്റ്റനെന്ന ലോക റെക്കോര്ഡില് രോഹിത് എത്തി. ക്രിക്കറ്റ് ചരിത്രത്തില് മറ്റൊരു നായകനും ഒരേ സമയത്ത് എല്ലാ ഫോര്മാറ്റുകളിലും തലപ്പത്തുള്ള ടീമിനെ നയിക്കാന് ഭാഗ്യമുണ്ടായിട്ടില്ല.
ടി20 ഫോര്മാറ്റിലാണ് ഇന്ത്യ രോഹിത് ശര്മയ്ക്കു കീഴില് ആദ്യം ഒന്നാം റാങ്ക് കൈക്കലാക്കിയത്. ടി20യില് ഇപ്പോഴും ഔദ്യോഗികമായി നായകസ്ഥാനം രോഹിത്തിനാണെങ്കിലും നിലവില് ടീമിനെ നയിക്കുന്നത് ഹാര്ദ്ദിക് പാണ്ഡ്യയാണ്. കഴിഞ്ഞ വര്ഷത്തെ ഐസിസി ടി20 ലോകകപ്പിനു ശേഷം രോഹിത് ടി20 ഫോര്മാറ്റില് കളിച്ചിട്ടില്ല.
ലോക ടെസ്റ്റ് ചാമ്പ്യന്ഷിപ്പും, വരുന്ന ഏകദിന ലോകകപ്പും നേടാനായാല് രോഹിത് എന്ന നായകന് ഇനിയും പ്രകീര്ത്തിക്കപ്പെടുമെന്ന് ഉറപ്പ്. എം.എസ് ധോണിയുടെ കാലത്തുപോലും സാധിക്കാതെ പോയ നേട്ടമാണ് രോഹിത്തിന് സാധിച്ചിരിക്കുന്നത് എന്നാണ് ശ്രദ്ധേയമായ കാര്യം.