ഐപിഎല്ലിൽ പാറ്റ് കമ്മിൻസിന്റെ ഉജ്വല ഇന്നിങ്സ് കൊൽക്കത്തയെ വിജയത്തിലെത്തിച്ചതിനു പിന്നാലെയുള്ള ‘വട പാവ്’ ട്വീറ്റിനു മുൻ ഇന്ത്യൻ ഓപ്പണർ വീരേന്ദർ സേവാഗിനു രോഹിത് ശർമ ആരാധകരുെട വ്യാപക വിമർശനം നേരിട്ടിരുന്നു. വിമർശനം കടുത്തതോടെ ട്വീറ്റിൽ വ്യക്തത വരുത്തി സേവാഗും രംഗത്തെതി താൻ എന്താണ് ഉദ്ദേശിച്ചതെന്ന് വ്യക്തമാക്കിയിരുന്നു. ഇപ്പോഴിതാ സേവാഗിനെ പോലെ ഇതിഹാസമായ ഒരു താരത്തെ ട്വിറ്ററിൽ അസഭ്യം കേൾക്കേണ്ടി വന്ന സാഹചര്യത്തിൽ തന്റെ അഭിപ്രായം പറഞ്ഞിരിക്കുകയാണ് മുൻ ഇന്ത്യൻ താരം ഓജ.
“സത്യത്തിൽ സേവാഗിനെ പോലെ ഒരു ഇതിഹാസത്തിന് താൻ ഉദ്ദേശിച്ചത് എന്താന്നെന്ന് ഒരിക്കൽക്കൂടി വ്യക്തമാക്കുന്ന സാഹചര്യം ഉണ്ടായിരിക്കുന്നത് നിരാശാപെടുത്തുന്നു. ഒരു ആവശ്യവും ഇല്ലാത്ത മോശം ട്രോളുകൾ കണ്ടാണ് സേവാഗിന് ഇങ്ങനെ ചെയ്യേണ്ടതായി വന്നത്. നമ്മുടെ സ്പോർട്ടിങ് ഇക്കോ സിസ്റ്റത്തിന്റെ കുഴപ്പമാണിത്. എല്ലാം വികാരത്തോടെയാണ് നമ്മൾ പ്രതികരിക്കുന്നത്,കാര്യം പോലും അറിയാതെ” ഓജ തന്റെ അമർഷം വ്യക്തമാക്കി.
മുംബൈ തോറ്റതിന് പിന്നാലെയുള്ള സേവാഗിനെ ട്വീറ്റ് രോഹിത് ആരാധകർ ഏറ്റെടുക്കുകയും സേവാഗിനെ മോശം പറയുകയുമാണ് ചെയ്തത്. പിന്നാലെ ‘വട പാവ്’ ട്വീറ്റ് മുംബൈയെ ഉദ്ദേശിച്ചുള്ളതാണെന്നും രോഹിത്തിനെക്കുറിച്ചല്ലെന്നും ട്വീറ്റ് ചെയ്ത സേവാഗ്, താൻ രോഹിത് ശർമയുടെ ബാറ്റിങ്ങിന്റെ ആരാധകനാണെന്നും കുറിച്ചു.
എന്തായാലും കുറച്ച് നാളായി എന്തിനും ഏതിനും പൊങ്കാലയിടുന്ന ആരാധക രീതിയുടെ ഇര ആയിരിക്കുന്നത് ഇത്തവണ വീരു ആയെന്ന് മാത്രമാണെന്നും അഭിപ്രായങ്ങൾ ഉണ്ടായിരുന്നു.