ഓസ്ട്രേലിയൻ മുൻ ക്യാപ്റ്റൻ റിക്കി പോണ്ടിംഗ്, ദക്ഷിണാഫ്രിക്കൻ ഓൾറൗണ്ടർ ജാക്വസ് കാലിസിനെ എക്കാലത്തെയും മികച്ച ക്രിക്കറ്റ് കളിക്കാരനായി തിരഞ്ഞെടുത്തു. 166 ടെസ്റ്റ് മത്സരങ്ങളിൽ നിന്ന് 45 സെഞ്ചുറികളും 58 അർദ്ധ സെഞ്ചുറികളും ഉൾപ്പെടെ 55.37 ശരാശരിയിൽ 13,289 റൺസാണ് കാലിസ് നേടിയത്. 32.65 ശരാശരിയിൽ 292 വിക്കറ്റുകളും അദ്ദേഹം സ്വന്തമാക്കി.
യൂട്യൂബിൽ ദി ഹൗവി ഗെയിംസ് പോഡ്കാസ്റ്റിൽ സംസാരിക്കവേ പോണ്ടിംഗ് പ്രഖ്യാപിച്ചു, “എക്കാലത്തെയും മികച്ച ക്രിക്കറ്റ് കളിക്കാരനാണ് ജാക്വസ് കാലിസ്. മറ്റാരെയും ഞാൻ കാര്യമാക്കുന്നില്ല.” തുടർന്ന് അദ്ദേഹം ഇങ്ങനെ പറഞ്ഞു “അവനാണ് എനിക്ക് ഫുൾ സ്റ്റോപ്പ്. പതിമൂവായിരം റൺസ്, 45 ടെസ്റ്റ് സെഞ്ചുറികൾ, 300 വിക്കറ്റുകൾ – എന്തൊരു അവിശ്വസനീയമായ കരിയർ. നിങ്ങൾക്ക് 300 വിക്കറ്റുകൾ എടുക്കാം അല്ലെങ്കിൽ 45 ടെസ്റ്റ് സെഞ്ചുറികൾ സ്കോർ ചെയ്യാം, എന്നാൽ രണ്ടും ഒരേസമയം ചെയ്യുന്നത് ശ്രദ്ധേയമാണ്. രണ്ടും ജാക്വസ് നേടിയിട്ടുണ്ട്.”
ഒരു ഫീൽഡർ എന്ന നിലയിൽ കാലിസിൻ്റെ കഴിവുകൾ പോണ്ടിംഗ് എടുത്തുപറഞ്ഞു, സ്ലിപ്പ് കോർഡനിലെ അദ്ദേഹത്തിൻ്റെ മികവിനെക്കുറിച്ച് സംസാരിച്ചു “അദ്ദേഹത്തിന് സ്ലിപ്പിൽ അസാധ്യ മികവ് ഉണ്ടായിരുന്നു. ക്യാച്ചുകൾ അവൻ നഷ്ടപെടുത്തുന്നത് കുറവായിരുന്നു.”
168 ടെസ്റ്റുകളിൽ നിന്ന് 51.85 ശരാശരിയിൽ 13,378 റൺസ് നേടിയ പോണ്ടിംഗ്, സച്ചിൻ ടെണ്ടുൽക്കറെയും ബ്രയാൻ ലാറയെയും പോലുള്ള കളിക്കാർക്ക് ലഭിച്ച അത്രയും അംഗീകാരം കാലിസിന് ലഭിച്ചിട്ടില്ലെന്ന് നിരീക്ഷിച്ചു. “അദ്ദേഹം ഏറ്റവും മികച്ചവനും ഏറ്റവും അണ്ടർ റേറ്റഡ് ആണെന്നും ഞാൻ കരുതുന്നു,” പോണ്ടിംഗ് പറഞ്ഞു. “അവൻ്റെ സ്വഭാവവും വ്യക്തിത്വവും കൊണ്ടാവാം, അവൻ വേണ്ടത്ര സംസാരിക്കപ്പെടുന്നില്ല. അവൻ ഒരു താഴ്ന്ന പ്രൊഫൈൽ സൂക്ഷിക്കുന്നു, മാധ്യമ പ്രവർത്തനങ്ങളിൽ കാര്യമായി ഇടപെടാത്തതിനാൽ, അവൻ അൽപ്പം അവഗണിക്കപ്പെടുന്നു.”