ഐപിഎല്ലില് ഇന്നത്തെ ആദ്യ മത്സരത്തില് പഞ്ചാബ് കിങ്സിനെതിരെ റോയല് ചലഞ്ചേഴ്സ് ബാംഗ്ലൂരിന് മികച്ച സ്കോര്. ആദ്യം ബാറ്റ് ചെയ്ത ആര്സിബി ഏഴ് വിക്കറ്റിന് 164 റണ്സ് നേടി. ഷാര്ജയില് സീസണിലെ ഉയര്ന്ന സ്കോറാണിത്.
വെടിക്കെട്ട് വീരന് ഗ്ലെന് മാക്സ്വെലിന്റെ തകര്പ്പന് അടികളാണ് റോയല് ചലഞ്ചേഴ്സിന് പ്രതീക്ഷാനിര്ഭരമായ സ്കോര് സമ്മാനിച്ചത്. 33 പന്തില് മൂന്ന് ഫോറും നാല് കൂറ്റന് സിക്സും അടക്കം 57 റണ്സ് അടിച്ചുകൂട്ടിയ മാക്സി ആര്സിബിക്ക് കുതിപ്പേകി. നായകന് വിരാട് കോഹ്ലിയും (25) ദേവദത്ത് പടിക്കലും (40) നല്കിയ മികച്ച അടിത്തറയില് നിന്നാണ് മാക്സ്വെല് നിറഞ്ഞാടിയത്. മുഹമ്മദ് ഷമി എറിഞ്ഞ അവസാന ഓവറില് മാക്സ്വെല് പുറത്താകുമ്പോഴേക്കും എതിരാളികളില് സമ്മര്ദ്ദമുണ്ടാക്കുന്ന സ്കോര് ആര്സിബി ഉറപ്പിച്ചിരുന്നു.
അതേസമയം, മാക്സ്വെലിനൊപ്പം ഏറെ നേരം ക്രീസില് നിന്ന എ.ബി. ഡിവില്ലിയേഴ്സിന് പെരുമയ്ക്കൊത്ത പ്രകടനം സാധ്യമായില്ല. രണ്ട് സിക്സും ഒരു ഫോറും അടക്കം 18 പന്തില് 23 റണ്സ് നേടിയ എബിഡി, മാക്സിയെപ്പോലെ കത്തിക്കയറിയിരുന്നെങ്കില് റോയല് ചലഞ്ചേഴ്സ് ഇരുനൂറിന് അടുത്തൊരു സ്കോറില് എത്തിയേനെ. തുടക്കത്തില് മോയ്സസ് ഹെന്റിക്വസും അന്ത്യ ഓവറുകളില് ഷമിയും പഞ്ചാബിനായി മികച്ച ബോളിംഗ് പുറത്തെടുത്തു. ഇരുവരും മൂന്ന് വിക്കറ്റ് വീതം പങ്കിട്ടു.