ഇംഗ്ലണ്ടിനെതിരായ ടെസ്റ്റ് പരമ്പരയ്ക്കുളള ഇന്ത്യൻ ടീമിൽ ഇടംനേടി വർഷങ്ങൾക്ക് ശേഷം തിരിച്ചെത്തിയ താരമാണ് കരുൺ നായർ. കഴിഞ്ഞ ആഭ്യന്തര സീസണിൽ കാഴ്ചവച്ച ഗംഭീര പ്രകടനമാണ് കരുണിന് ഇന്ത്യൻ ടീമിൽ വീണ്ടും അവസരം ലഭിക്കാൻ കാരണമായത്. എട്ട് വർഷത്തിന് ശേഷമാണ് കരുൺ നായർക്ക് ഇന്ത്യൻ ടീമിൽ നിന്നുളള വിളി എത്തിയത്. വിരാട് കോഹ്ലി, രോഹിത് ശർമ്മ എന്നിവർ വിരമിച്ചതോടെ ഇംഗ്ലണ്ട് പരമ്പരയിൽ ഇന്ത്യൻ ടീമിലെ പ്രധാന താരമായി മാറിയിരിക്കുകയാണ് ഇപ്പോൾ കരുൺ. സീരീസ് അടുക്കവേയാണ് ഒരു ഞെട്ടിക്കുന്ന വെളിപ്പെടുത്തലുമായി താരം രംഗത്തെത്തിയത്.
മുൻപ് ഒരു ഇന്ത്യൻ ക്രിക്കറ്റ് താരം തന്നോട് അന്താരാഷ്ട്ര ക്രിക്കറ്റിൽ നിന്നും വിരമിക്കാൻ ആവശ്യപ്പെട്ടുവെന്നാണ് കരുൺ പറഞ്ഞത്. ഇന്റർനാഷണൽ ക്രിക്കറ്റിൽ നിന്നും വിരമിക്കൂവെന്നും ടി20 ലീഗിൽ കളിച്ച് പണമുണ്ടാക്കൂ എന്നുമാണ് അദ്ദേഹം തന്നോട് പറഞ്ഞതെന്ന് കരുൺ വെളിപ്പെടുത്തി. “ഒരു പ്രമുഖ ഇന്ത്യൻ ക്രിക്കറ്റ് താരം എന്നെ വിളിച്ച് വിരമിക്കണമെന്ന് പറഞ്ഞത് ഇപ്പോഴും ഓർക്കുന്നു. കാരണം ടി20 ലീഗുകളിൽ നിന്നുളള പണം നിങ്ങളെ സുരക്ഷിതരാക്കും. അങ്ങനെ ചെയ്യാൻ എളുപ്പമായിരുന്നു”.
“പക്ഷേ പണത്തേക്കാൾ ഉപരി, ഇത്ര വേഗത്തിൽ അന്താരാഷ്ട്ര ക്രിക്കറ്റ് ഉപേക്ഷിച്ചതിന് പിന്നീട് ഞാൻ എന്നെ തന്നെ കുറ്റപ്പെടുത്തുമെന്ന് എനിക്കറിയാമായിരുന്നു. ഇന്ത്യയ്ക്ക് വേണ്ടി കളിക്കുന്നത് ഞാൻ ഇനി ഒരിക്കലും ഉപേക്ഷിക്കാൻ പോകുന്നില്ല. അതെല്ലാം രണ്ട് വർഷം മുൻപായിരുന്നു. ഇപ്പോൾ നമ്മൾ എവിടെയാണെന്ന് നോക്കൂ. ഇത് ഒരുതരത്തിൽ അമിതാവേശമാണ്. പക്ഷേ ഉളളിന്റെയുളളിൽ ഞാൻ സംതൃപ്തനാണെന്ന് എനിക്കറിയാം”, കരുൺ നായർ പറഞ്ഞു.