ഇന്ത്യ-പാകിസ്ഥാൻ അതിർത്തിയിലെ സംഘർഷങ്ങളെത്തുടർന്ന് താൽക്കാലികമായി നിർത്തിവച്ച ഐപിഎൽ 2025 സീസൺ പുനരാരംഭിക്കുമ്പോൾ, ഇത് എംഎസ് ധോണിയുടെ അവസാന സീസണായിരിക്കുമോ എന്ന് ചെന്നൈ സൂപ്പർ കിംഗ്‌സിന്റെ (സിഎസ്‌കെ) ആരാധകർ വീണ്ടും ആശ്ചര്യപ്പെടുന്നു.
എന്നിരുന്നാലും, ടൈംസ് ഓഫ് ഇന്ത്യയുടെ റിപ്പോർട്ട് അനുസരിച്ച്, ഇതിഹാസ നായകൻ ഇതുവരെ സിഎസ്‌കെ മാനേജ്‌മെന്റിനെ വിരമിക്കൽ പദ്ധതികളൊന്നും അറിയിച്ചിട്ടില്ല. ലീഗിന്റെ തുടക്കം മുതൽ ഫ്രാഞ്ചൈസിയുടെ മുഖമായ ധോണി 2026 സീസണിലും കളിക്കുന്നത് ആലോചിക്കുന്നുണ്ടെന്ന് റിപ്പോർട്ടുണ്ട്. ഇത് ഒരു വിടവാങ്ങൽ സീസണാണെന്ന് പലരും വിശ്വസിച്ചിരുന്നെങ്കിലും, സിഎസ്‌കെ ക്യാമ്പ് വിശ്വസിക്കുന്നത് അദ്ദേഹത്തിൽ കൂടുതൽ ശേഷിക്കുന്നുണ്ടെന്നാണ്.
2025 ലെ ഐപിഎല്ലിൽ ചെന്നൈക്ക് സന്തോഷിക്കാൻ പറ്റിയ ഒന്നും തന്നെ ഉണ്ടായിട്ടില്ല എന്ന് പറയാം. പോയിന്റ് പട്ടികയിൽ ഏറ്റവും താഴെയാണ് അവർ നിൽക്കുന്നത് . കൈമുട്ടിനേറ്റ പരിക്കിനെ തുടർന്ന് സീസണിന്റെ മധ്യത്തിൽ ഗെയ്‌ക്‌വാദ് പുറത്തായതോടെ ധോണി വീണ്ടും നായകസ്ഥാനത്തേക്ക് തിരിച്ചുവന്നു. പ്രായത്തെയും മോശം ബാറ്റിംഗ് ഫോമിനെയും കുറിച്ചുള്ള വിമർശനങ്ങൾക്കിടയിലും, ലോവർ ഓർഡർ ബാറ്റ്‌സ്മാനോ വിക്കറ്റ് കീപ്പറോ എന്ന നിലയിൽ മാത്രമല്ല, യുവ ടീമിനെ നയിക്കുന്ന ഒരു ഉപദേഷ്ടാവ് എന്ന നിലയിലും ധോണിയുടെ സാന്നിധ്യത്തിൽ സിഎസ്‌കെ മാനേജ്‌മെന്റ് ഹാപ്പിയാണ്.
ചെന്നൈ ടീമിൽ നിലവിൽ ഉള്ള യുവതാരങ്ങൾക്ക് പാഠങ്ങൾ പഠിപ്പിച്ച് കൊടുക്കാനും അവരെ സെറ്റ് ആക്കാനും ധോണിയാണ് ഏറ്റവും നല്ല ഓപ്ഷൻ എന്ന് ചെന്നൈ വിശ്വസിക്കുന്നു. അതിനാൽ തന്നെ ധോണി തുടരും എന്ന് തന്നെ പറയാം.