ലോക കായിക ഭൂപടത്തില്‍ ഒരു വിപ്ലവം തന്നെയാണ് ഐപിഎല്ലെന്ന നിരീക്ഷണവുമായി മുന്‍ ഇംഗ്ലീഷ് താരം ഒവെയ്സ് ഷാ. ആരാധകരുടെ പിന്തുണയാണ് ഐപിഎല്ലിനെ മറ്റ് ടൂര്‍ണമെന്റുകളില്‍ നിന്ന് വ്യത്യസ്തമാക്കുന്നതെന്നാണ് മുന്‍ ഐപിഎല്‍ താരം കൂടിയായ ഒവെയ്സ് ഷാ തുറന്ന് പറയുന്നത്.
ആരാധകരുടെ കാര്യത്തില്‍ ഏഷ്യ കഴിഞ്ഞാല്‍ ഏറ്റവുധികം പേര്‍ ഐപിഎല്‍ കാണുന്നത് അമേരിക്കയിലാണെന്ന് ഷാ നിരീക്ഷിക്കുന്നു. ലോകത്തിലെ ഏറ്റവും വലിയ ടൂര്‍ണമെന്റ് തന്നെയാണ് ഐപിഎല്‍. ഏറ്റവുമധികം പേര്‍ കാണുന്ന ടൂര്‍ണമെന്റും ഇതു തന്നെയാണ്. അമേരിക്കയെ പോലുള്ള രാജ്യത്തു പോലും വലിയ തരംഗമായി മാറാന്‍ ഐപിഎല്ലിനായിട്ടുണ്ട്. ഇത് ഐപിഎല്ലിനെ മറ്റൊരു തലത്തിലേക്ക് ഉയര്‍ത്തുന്നതായും ഷാ പറയുന്നു.
ആരാധക പിന്തുണയുടെ കാര്യത്തില്‍ മാത്രമല്ല വരുമാനത്തിന്റെ കാര്യത്തിലും ഐപിഎല്ലിലെ വെല്ലാന്‍ മറ്റൊരു ടൂര്‍ണമെന്റില്ലെന്നു ഷാ പറഞ്ഞു. മികച്ച പാക്കേജ് തന്നെയാണ് ഐപിഎല്ലില്‍ താരങ്ങള്‍ ലഭിക്കുന്നത്. ഇതും ഐപിഎല്ലിനെ മറ്റു ടൂര്‍ണമെന്റുകളുമായി മാറ്റി നിര്‍ത്തുന്നു. ലോകത്തിന്റെ മറ്റൊരു ഭാഗത്തും ഐപിഎല്‍ പോലൊരു ടൂര്‍ണമെന്റില്ലെന്നു നിങ്ങള്‍ക്കു ഇതിന്റെ ഭാഗമായി കഴിഞ്ഞാല്‍ ബോദ്ധ്യമാവുമെന്നും ഷാ വിശദമാക്കി.
ഐപിഎല്ലില്‍ മുന്‍ ജേതാക്കളായ കൊല്‍ക്കത്ത നൈറ്റ്റൈഡേഴ്സ്, രാജസ്ഥാന്‍ റോയല്‍സ്, കേരളത്തില്‍ നിന്നുള്ള മുന്‍ ടീമായിരുന്ന കൊച്ചി ടസ്‌കേഴ്സ് കേരള, ഡല്‍ഹി ക്യാപ്പിറ്റല്‍സ് (പഴയ ഡല്‍ഹി ഡെയര്‍ഡെവിള്‍സ്) ടീമുകള്‍ക്കു വേണ്ടിയും ഷാ കളിച്ചിട്ടുണ്ട്. ഐപിഎല്ലില്‍ നാലു ഫ്രാഞ്ചൈസികള്‍ക്കും കൂടി 23 മല്‍സരങ്ങളില്‍ കളിച്ച ഷാ 33.73 ശരാശരിയില്‍ 506 റണ്‍സ് നേടിയിട്ടുണ്ട്.