ഐപിഎല്ലില് നിര്ണായക മത്സരത്തില് കെകെആര് മുന്നോട്ടുവെച്ച 150 റണ്സ് വിജയലക്ഷ്യത്തിലേക്ക് ബാറ്റിംഗിനിറങ്ങിയ രാജസ്ഥാന് റോയല്സിന് യശ്വസി ജയ്സ്വാള് വക മിന്നും തുടക്കം. കെകെആര് നായകന് നിതീഷ് റാണ എറിഞ്ഞ ആദ്യ ഓവറില് 26 റണ്സാണ് ജയ്സ്വാള് അടിച്ചെടുത്തത്.
അമിത ആത്മവിശ്വാസത്തില് ആദ്യ ഓവര് തന്നെ ബോള് കൈയിലെടുത്ത കെകെആര് നായകനെതിരെ ആദ്യ ബോളില് തന്നെ ജയ്സ്വാള് നിലപാടറിയിച്ചു. ആദ്യ ബോള് സിക്സര് പായിച്ച താരം രണ്ടാം ബോളും നിലംതൊടാതെ പറത്തി. മൂന്നും നാലും ആറും ബോളില് ഫോറും അഞ്ചാം ബോളില് ഡബിളും ജയ്സ്വാള് അടിച്ചെടുത്തു. ആദ്യ ഓവര് പൂര്ത്തിയായപ്പോള് സ്കോര് ബോര്ഡില് 26 റണ്സ്.
ഈ മത്സരത്തിലൂടെ ചരിത്രത്തില് ഏറ്റവും കൂടുതല് വിക്കറ്റ് വീഴ്ത്തിയ ബോളറായി രാജസ്ഥാന് റോയല്സ് താരം യുസ്വേന്ദ്ര ചാഹല് ചരിത്രപുസ്തകങ്ങളില് ഇടംനേടി . കെകെആര് നായകന് നിതീഷ് റാണയെ തന്റെ ആദ്യ ഓവറില് തന്നെ പുറത്താക്കിയാണ് ചാഹല് നാഴികക്കല്ല് സ്വന്തമാക്കിയത്.
കഴിഞ്ഞ മത്സരത്തില് ഡ്വെയ്ന് ബ്രാവോയ്ക്കൊപ്പം സമനില പാലിച്ച ചാഹല് ഐപിഎല് വിക്കറ്റ് വേട്ടക്കാരുടെ പട്ടികയില് ഇപ്പോള് ഒന്നാം സ്ഥാനത്താണ്. ഐപിഎലില് ഇതുവരെ 143 മത്സരങ്ങള് കളിച്ച താരത്തിന്റെ പേരില് 184 വിക്കറ്റുകളാണ് ഉള്ളത്.161 മത്സരങ്ങള് കളിച്ച് 183 വിക്കറ്റ് വീഴ്ത്തിയ ബ്രാവോയാണ് രണ്ടാമത്. 174 വിക്കറ്റ് വീഴ്ത്തിയ പിയൂഷ് ചൗളയാണ് മൂന്നാം സ്ഥാനത്ത്.
കൊല്ക്കത്തയിലെ ഈഡന് ഗാര്ഡന്സില് ഐപിഎല് 56-ാം മത്സരത്തില് കൊല്ക്കത്ത നൈറ്റ് റൈഡേഴ്സ് രാജസ്ഥാന് റോയല്സുമായി ഏറ്റുമുട്ടുകയാണ്. ആരാധകരെ വിസ്മയിപ്പിക്കുന്ന അവിശ്വസനീയമായ പ്രകടനമാണ് രാജസ്ഥാന് നടത്തുന്നത്. ടോസ് നേടിയ രാജസ്ഥാന് ക്യാപ്റ്റന് സഞ്ജു സാംസണ് കൊല്ക്കത്ത നൈറ്റ് റൈഡേഴ്സിനെ ആദ്യം ബാറ്റ് ചെയ്യാന് ക്ഷണിക്കുകയായിരുന്നു.