ഇന്ത്യന്‍ ക്രിക്കറ്റിലെ അടുത്ത എംഎസ് ധോണിയോ യുവരാജ് സിംഗോ ആവാന്‍ സാധിക്കുന്ന താരമാണ് റിങ്കു സിംഗെന്ന് ഇന്ത്യയുടെ മുന്‍ വിക്കറ്റ് കീപ്പറും മുഖ്യ സെലക്ടറുമായ കിരണ്‍ മോറെ. അയര്‍ലാന്‍ഡിനെതിരേ ഡബ്ലിനില്‍ നടന്ന ആദ്യ ടി20 മല്‍സരത്തിലൂടെ റിങ്കു അന്താരാഷ്ട്ര ക്രിക്കറ്റില്‍ അരങ്ങേറിയതിന്റെ പശ്ചാത്തലത്തില്‍ സംസാരിക്കുകയായിരുന്നു അദ്ദേഹം.
റിങ്കു സിങിനു ഭാവിയില്‍ ഇന്ത്യയുടെ മികച്ച ഫിനിഷറായി മാറാന്‍ കഴിയും. എംഎസ് ധോണിയെയും യുവരാജ് സിംഗിനെയുമെല്ലാം ഈ റോളില്‍ നമ്മള്‍ നേരത്തേ കണ്ടിട്ടുള്ളതാണ്. പക്ഷെ അവര്‍ക്കു ശേഷം പിന്നീട് നമുക്ക് അവരെപ്പോലെയുള്ള കളിക്കാരെ ലഭിച്ചതുമില്ല.
ധോണിയെയും യുവിയെയും പോലെയുള്ള താരങ്ങളെ സൃഷ്ടിച്ചെടുക്കാന്‍ നമ്മള്‍ ശ്രമിച്ചിരുന്നെങ്കിലും അതു വിജയിക്കാതെ പോവുകയായിരുന്നു. പക്ഷെ ഇപ്പോള്‍ റിങ്കുവിലൂടെ അടുത്ത ധോണിയോ, യുവരാജോ ആവാന്‍ സാധിക്കുന്ന ഒരാളെ നമുക്കു ലഭിച്ചിരിക്കുകയാണ്. റിങ്കുവിനെക്കൂടാതെ തിലക് വര്‍മയും ഇപ്പോള്‍ ടീമിലുണ്ട്.
റിങ്കു വളരെ മികച്ച ഫീല്‍ഡറും കൂടിയാണ്. ആഭ്യന്തര ക്രിക്കറ്റിലും അവന്റെ പ്രകടനം ഞാന്‍ നേരത്തേ കണ്ടിട്ടുള്ളതാണ്. റിങ്കു ഇപ്പോള്‍ ഒരുപാട് മെച്ചപ്പെട്ടതായി ഞാന്‍ കരുതുന്നു- കിരണ്‍ മോറെ പറഞ്ഞു.
