ഇപ്പോൾ നടക്കുന്ന ടി-20 ലോകകപ്പിൽ ആരാധകർ ഒന്നടങ്കം കാത്തിരിക്കുന്ന മത്സരമാണ് ഇന്ത്യ പാകിസ്ഥാൻ പോരാട്ടം. നാളുകൾ ഏറെയായി പാകിസ്ഥാന് ഇന്ത്യയെ ഒരു മത്സരത്തിൽ പോലും പരാജയപ്പെടുത്താൻ സാധിച്ചിട്ടില്ല. ടൂർണമെന്റിലെ നിലവിലുള്ള പ്രകടനത്തിൽ മത്സരം വിജയിക്കാനുള്ള സാധ്യത ഇന്ത്യക്ക് തന്നെയാണെന്നാണ് ആരാധകരുടെ വിലയിരുത്തൽ.
ഇന്ത്യക്കെതിരെ നടക്കുന്ന മത്സരത്തിൽ അഭിഷേക് ശർമ്മ ടീമിൽ ഉണ്ടാകും എന്ന് പ്രതീക്ഷിക്കുന്നതായി പാകിസ്ഥാൻ നായകൻ സൽമാൻ അലി ആഗ പറഞ്ഞിരുന്നു. ഇപ്പോഴിതാ താരത്തിന് മറുപടിയായി രംഗത്ത് എത്തിയിരിക്കുകയാണ് ഇന്ത്യൻ നായകൻ സൂര്യകുമാർ യാദവ്.
നാളെ അഭിഷേക് കളിക്കണമെന്ന് സൽമാന് അത്ര നിർബന്ധമാണെങ്കിൽ, ഞങ്ങൾ അവനെ കളിപ്പിക്കും എന്നായിരുന്നു സൂര്യകുമാർ തമാശരൂപേണ മറുപടി നല്കിയത്. അഭിഷേക് മത്സരത്തിന് പൂർണ്ണ സജ്ജനാണെന്ന സൂചനയും സൂര്യകുമാര് നല്കി.