ഇന്ത്യൻ ടീമിലെ എക്കാലത്തെയും മികച്ച ബോളർമാരിൽ ഒരാൾ ആണ് മുഹമ്മദ് ഷമി. 2023 ഇൽ നടന്ന ഏകദിന ലോകകപ്പിൽ ഇന്ത്യക്കായി തകർപ്പൻ പ്രകടനം കാഴ്ച വെച്ച താരമാണ് അദ്ദേഹം. എന്നാൽ ഫൈനലിൽ ഇന്ത്യ ഓസ്ട്രേലിയയോട് തോൽവി ഏറ്റുവാങ്ങി. ആ മത്സരം കഴിഞ്ഞ് പരിക്കേറ്റ ഷമി പിന്നീട് ഇന്ത്യൻ ജേഴ്സിയിൽ കളിച്ചിരുന്നില്ല. ഇപ്പോഴിതാ ഇംഗ്ലണ്ടിനെതിരെ ഉള്ള പരമ്പരയിലും, ചാമ്പ്യൻസ് ട്രോഫിക്കും വേണ്ടി രാജകീയമായി തിരിച്ച് വന്നിരിക്കുകയാണ് അദ്ദേഹം. തന്റെ തിരിച്ച് വരവിനെ കുറിച്ച് ഷമി സംസാരിച്ചു.
മുഹമ്മദ് ഷമി പറയുന്നത് ഇങ്ങനെ:
“രാജ്യത്തിന് വേണ്ടി കളിക്കാനുള്ള വിശപ്പാണ് എനിക്ക്. ഒരിക്കലും ആ വിശപ്പ് അവസാനിക്കില്ല. ആ വിശപ്പ് നിങ്ങൾക്കുണ്ടെങ്കിൽ, നിങ്ങൾക്ക് എത്ര തവണ പരിക്കേറ്റാലും നിങ്ങൾ എപ്പോഴും പോരാടും. ഒരു കായികതാരത്തിന് അവരുടെ രാജ്യത്തിനായി കളിക്കാനുള്ള അടങ്ങാത്ത വിശപ്പ് ഉള്ളിടത്തോളം കാലം ഒന്നിലധികം പരിക്കുകളെ മറികടക്കാൻ കഴിയും.
നിങ്ങൾ കഠിനാധ്വാനികളും പ്രതിബദ്ധതയുള്ളവരുമാണെങ്കിൽ, ഒരു പരിക്കിനും നിങ്ങളെ കൂടുതൽ കാലം അകറ്റി നിർത്താൻ കഴിയില്ല. നിങ്ങൾ എപ്പോഴും മടങ്ങിവരാനുള്ള വഴി കണ്ടെത്തും, നീല ജേഴ്സി ധരിക്കുന്നത് പരമോന്നത ബഹുമതിയാണ്, വിശ്വസ്തതയോടും പ്രതിബദ്ധതയോടും കൂടി കളിക്കുന്ന ഓരോ കളിക്കാരനും രാജ്യത്തെ പ്രതിനിധീകരിക്കാനുള്ള അവസരം അർഹിക്കുന്നു”
ഈഡൻ ഗാർഡനുമായുള്ള തൻ്റെ അഗാധമായ ബന്ധത്തെക്കുറിച്ചും ഷമി സംസാരിച്ചു.
” ഹോം ഗ്രൗണ്ട് എല്ലായ്പ്പോഴും പ്രത്യേകതയുള്ളതാണ്. ഞാൻ എൻ്റെ കരിയർ ആരംഭിച്ചത് ഇവിടെയാണ്. ഞാൻ നേരത്തെയും പറഞ്ഞിട്ടുണ്ട് , ഞാൻ ജനിച്ച് വളർന്നത് ഉത്തർപ്രദേശിലാണെങ്കിലും, എന്നെ സൃഷ്ടിച്ചത് ബംഗാൾ ഇതാണ് എൻ്റെ വീട്, എൻ്റെ ജീവിതം” ഷമി കൂട്ടിച്ചേർത്തു.