ഇന്ത്യന് ക്രിക്കറ്റിലെ വന്മതിലെന്നു വിശേഷിപ്പിക്കപ്പെടുന്ന ഇതിഹാസ താരമാണ് രാഹുല് ദ്രാവിഡ്. വിരമിക്കലിനു ശേഷവും പരിശീലകനായി ഇന്ത്യന് ക്രിക്കറ്റിന്റെ നട്ടെല്ലായി നില്ക്കുകയാണ് താരം. ഇപ്പോഴിതാ സച്ചിന് ടെണ്ടുല്ക്കറിന്റെ ജന്മദിനമായ ഇന്ന് അദ്ദേഹത്തെ കുറിച്ച് ദ്രാവിഡ് മുമ്പ് പറഞ്ഞ വാക്കുകള് വീണ്ടും ആരാധകര് കുതിപ്പൊക്കിയിരിക്കുകയാണ്. തന്റെ റെക്കോഡുകള് വരുംകാലത്ത് ആരും ഓര്ക്കില്ലെങ്കിലും ക്രിക്കറ്റ് ഇതിഹാസം സച്ചിന് ടെണ്ടുല്ക്കറിനൊപ്പം കളിച്ചത് ആരും മറക്കില്ലെന്നാണ് ഒരിക്കല് ദ്രാവിഡ് പറഞ്ഞത്.
“ഞാന് കരിയറില് ടെസ്റ്റ് ക്രിക്കറ്റിലും ഒപ്പം ഏകദിന ഫോര്മാറ്റിലും 10000ലേറെ അന്താരാഷ്ട്ര റണ്സ് നേടിയിട്ടുണ്ട്. ഒരു പക്ഷേ എന്റെ ചെറുമക്കള് പോലും ഞാന് അടിച്ചെടുത്ത ഈ പതിനായിരം റണ്സിന്റെ ചരിത്രവും ഒപ്പം ഞാന് സ്വന്തം പേരില് കുറിച്ചിട്ട ഈ റെക്കോഡുകളും ഓര്ക്കണമെന്നില്ല.”
“പക്ഷേ ഞാന് സച്ചിന് എന്ന ഇതിഹാസ താരത്തിനൊപ്പം ബാറ്റ് ചെയ്തതും ഒപ്പം സച്ചിന്റെ ടീമിനൊപ്പം കളിച്ചതായും അവര് ഓര്ക്കും. ഏത് കാലത്തിലെ ജനറേഷനായാലും അവര് സച്ചിനെന്ന ക്രിക്കറ്ററെ മറക്കില്ല” ദ്രാവിഡ് പറഞ്ഞു.
ടെസ്റ്റ് ക്രിക്കറ്റില് സുനില് ഗവാസ്ക്കര്, സച്ചിന് എന്നിവര്ക്ക് ശേഷം ആദ്യമായി പതിനായിരം റണ്സ് അടിച്ചെടുത്ത താരമാണ് ദ്രാവിഡ്. 164 ടെസ്റ്റ് മത്സരങ്ങളില് നിന്നായി 13288 റണ്സും 344 ഏകദിനങ്ങളില് നിന്നായി 10889 റണ്സും ദ്രാവിഡ് നേടിയിട്ടുണ്ട്.