ഇന്ത്യൻ ക്രിക്കറ്റ് ആരാധകർ പ്രീമിയർ ലീഗിന്റെ ആവേശത്തിനിടയിലും ആശങ്കപെടുന്നത് അവരുടെ സൂപ്പർ താരങ്ങളുടെ മോശം ഫോം കണ്ടിട്ടാണ്. നായകൻ രോഹിത്, മുൻ നായകൻ കോഹ്ലി , ഓൾ റൗണ്ടർ ജഡേജ , പ്രധാന ബൗളറുമാരായ സിറാജ്, ബുംറ എന്നിവരാണ് മോശം ഫോമിലൂടെ കടന്നുപോകുന്നത്. ഓസ്‌ട്രേലിയയിൽ നടക്കുന്ന ലോകകപ്പിൽ സൂപ്പർ താരങ്ങൾ അവസരത്തിനൊത്ത് ഉയർന്നില്ലെങ്കിൽ കഴിഞ്ഞ വർഷത്തെ പോലെ ആദ്യ റൗണ്ടിൽ തന്നെ തിരിച്ചുപോകേണ്ട അവസ്ഥ വരുമോ എന്നാണ് ആരാധക പേടി.
എന്നാൽ ആരാധകർ പേടിക്കേണ്ട ” അർദ്ധ വാർഷിക പരീക്ഷയിൽ ഉഴപ്പിയിട്ട്” വാർഷിക പരീക്ഷയിൽ നല്ല മാർക്കോടെ സ്ഥിരം ജയിക്കുന്ന ആളുകളാണിവർ എല്ലാം. പോയ കാലങ്ങളിൽ ഒരുപാട് ടൂർണമെന്റുകൾ തുടർച്ചായി കളിച്ചതിന്റെ ക്ഷീണം ഇവർക്കെല്ലാമുണ്ട്. വിശ്രമം ഇല്ലാതെ പ്രവർത്തിക്കുന്ന യന്ത്രങ്ങൾക്ക് ചിലപ്പോൾ സംഭവിക്കുന്ന ചെറിയ ചെറിയ കുഴപ്പങ്ങൾ മാത്രമേ ഇവർക്ക് സംഭവിച്ചിട്ടോള്ളൂ. അതിനാൽ തന്നെ പൂർണ ഫിറ്റ് ആയി ഇവരെ നമുക് പ്രതീക്ഷിക്കാം.
പുറത്ത് വരുന്ന റിപോർട്ടുകൾ പ്രകാരം വരാനിരിക്കുന്ന പരമ്പരകളിൽ ചിലതിൽ സൂപ്പർ താരങ്ങൾക്ക് വിശ്രമം അനുവദിക്കാൻ സാധ്യതയുണ്ട്. ആ വിശ്രമം താരങ്ങൾക്ക് വലിയ സഹായമാകും എന്നുറപ്പാണ്. “back to basics” കോഹ്ലിക്ക് ഒകെ വിശ്രമത്തിന്റെ നാളുകൾ സ്വയം ഒരു തിരിഞ്ഞുനോട്ടത്തിലേക്ക് ശ്രമിക്കാം. ഒരു കാലത്തെ തന്റെ പല ശക്തികളും ഇന്ന് വലിയ ദൗർബല്യം ആയിരിക്കുന്നു. സച്ചിൻ ഒരു കവർഡ്രൈവ് പോലും കളിക്കാതെ നേടിയ 248 റൺസ് ഇന്നിംഗ്സ് കോഹ്ലിക്ക് മാതൃകയാക്കാം. തനിക്ക് വന്ന പിഴവുകൾ പരിശോധിക്കാൻ ആഭ്യന്തര മത്സരങ്ങൾ കൂടുതലായി കളിക്കാനും കുറവുകളെ കഴിവുകളാക്കാനും ശ്രമിക്കാം.
പഠിച്ച് ക്ഷീണിച്ച സ്കൂൾ കുട്ടികൾക്ക് നൽകാറുള്ള വേനലവധി നൽകുന്ന പോലെ തുടർച്ചയായി മത്സരങ്ങൾ കളിച്ച താരങ്ങൾക്ക് നൽകുന്ന വിശ്രമം തിരിച്ചുവരുമ്പോൾ പഴയതിലും ഫിറ്റ് ആയി വരുമെന്ന് ഉറപ്പിക്കാം.