ഇന്ത്യന് പ്രീമിയര് ലീഗ് 2023-ല് ഋഷഭ് പന്തിന് പകരക്കാരനായി ബംഗാളിലെ യുവ വിക്കറ്റ് കീപ്പര് ബാറ്ററെ തിരഞ്ഞെടുക്കാന് ഡല്ഹി ക്യാപിറ്റല്സ് ഒരുങ്ങുന്നതായി റിപ്പോര്ട്ട്. വരുന്ന സീസണില് പന്തിന്റെ സ്ഥാനത്ത് അഭിഷേക് പോറല് എന്ന 20-കാരന് കളിക്കും. ഡിസംബറില് ഒരു വാഹനാപകടത്തില് പരിക്കേറ്റ പന്ത് ഈ ഐപിഎല് സീസണില് കളിക്കുന്നില്ല. അദ്ദേഹത്തിന്റെ അഭാവത്തില് ഡേവിഡ് വാര്ണറാണ് ഡല്ഹി ടീമിനെ നയിക്കുന്നത്.
ബംഗാളിന്റെ വിക്കറ്റ് കീപ്പറായ പോറല് പന്തിനെപ്പോലെ ഇടംകൈയന് ബാറ്റര് കൂടിയാണ്. പന്തിന്റെ അഭാവത്തില് പ്രകടനങ്ങളുലൂടെ അമ്പരപ്പിക്കാനും സ്വയം ടീമില് സ്ഥാനമുറപ്പിക്കാനുമുള്ള ഒരു സുവര്ണ അവസരമാണ് പോറലിന് ലഭിച്ചിരിക്കുന്നത്.
ഇന്ത്യന് പ്രീമിയര് ലീഗില് ഇതു വരെ കിരീടം നേടാനായിട്ടില്ലാത്ത ഫ്രാഞ്ചൈസിയാണ് ഡല്ഹി. ആ നാണക്കേട് ഇത്തവണ അവസാനിപ്പിക്കുകയെന്ന ലക്ഷ്യവുമായാണ് ഡല്ഹി ക്യാപിറ്റല്സിന്റെ മുന്നൊരുക്കങ്ങള്.
വാഹനാപകടത്തില് പരിക്കേറ്റ നായകന് ഋഷഭ് പന്തിന് സീസണ് നഷ്ടമാകുമെന്നത് ഫ്രാഞ്ചൈസിയ്ക്ക് കനത്ത തിരിച്ചടിയാണ്. എന്നിരുന്നാലും നായകസ്ഥാനത്തേക്കുള്ള വാര്ണറുടെ വരവ് പുതിയ അത്ഭുതങ്ങള് സൃഷ്ടിക്കുമെന്നാണ് കരുതുന്നത്. 2016ല് സണ്റൈസേഴ്സ് ഹൈദരാബാദ് കിരീടം ചൂടിയപ്പോള് വാര്ണറായിരുന്നു ക്യാപ്റ്റന്.