റോണി ജേക്കബ്
1998 ൽ നഷ്ടത്തിലായിരുന്ന തൻ്റെ ടാറ്റാ മോട്ടേഴ്സ് ഏറ്റെടുക്കാൻ, വാഹന ഭീമൻമാരായ ഫോർഡിന് താൽപര്യമുണ്ടോ എന്നറിയാൻ, ശ്രീ രത്തൻ ടാറ്റാ അമേരിക്കയിലെ ഡിട്രോയിറ്റിലെത്തിയിരുന്നു. പക്ഷേ, അപമാനിതനായിട്ടാരുന്നു മടക്കം.
20 വർഷങ്ങൾക്കിപ്പുറം തകർച്ച നേരിട്ട ഫോർഡ് ഇന്ത്യയുടെ, ആഡംബരക്കാറുകളായ ജാഗ്വാറും ലാൻഡ് റോവറും ഏറ്റെടുത്തായിരുന്നു രത്തൻ ടാറ്റാ മധുര പ്രതികാരം ചെയ്തത്. ഇനി, ക്രിക്കറ്റിലെ ഒരു രത്തൻ ടാറ്റായെ നമുക്ക് പരിചയപ്പെടാം. അത് മറ്റാരുമല്ല, നമ്മുടെയെല്ലാം പ്രിയപ്പെട്ട ഡേവിഡ് വാർണർ ആണ്.
കുറച്ച് മൽസരങ്ങളിലെ,മോശം ഫോമിനെത്തുടർന്ന് ആദ്യം ഹൈദരാബാദിൻ്റെ ക്യാപ്റ്റൻസി പോയി. പക്ഷേ, അതിലും വലിയ അപമാനം ആയിരുന്നു, കഴിഞ്ഞ വർഷം പിന്നീട്, അദ്ദേഹം നേരിട്ടത്.. ടീമിൻ്റെ പ്ലെയിങ് ഇലവനിൽ പോലും വാർണറെ ഉൾപ്പെടുത്തിയില്ല. കളിക്കാർക്കുള്ള ഡ്രിങ്സ് ബോട്ടിലുകളുമായി, ഡഗ്ഗൗട്ടിലിരിക്കുന്ന ഡേവിഡിൻ്റെ മുഖം ആരും മറക്കാൻ ഇടയില്ല.
ഡിട്രോയിറ്റിൽ നിന്നു തിരിച്ചു വന്ന രത്തൻ ടാറ്റ തളരാതിരുന്നതു പോലെ, ഹൈദരാബാദിൽ നിന്നു പുറത്തായ വാർണറും തളർന്നില്ല. ജീവിതത്തിലെ താഴ്ചകളിൽ തളരാതെ, ആത്മാർത്ഥമായി പ്രയത്നിച്ചാൽ, തകർപ്പൻ തിരിച്ചുവരവ് നടത്താൻ സാധിക്കുമെന്ന് ഡേവിഡ് നമുക്ക് കാട്ടിത്തരുന്നു. ഇത്തവണ കളിച്ച 4 മൽസരങ്ങളിൽ 3 അർദ്ധശതകവുമായിട്ടാണ് അദ്ദേഹം കളം നിറയുന്നത് അതും, തുടർച്ചയായി.
ആദ്യം കൊൽക്കത്തയ്ക്ക് എതിരെ 45 പന്തിൽ 61. പിന്നാലെ ബാംഗ്ലൂരിന് എതിരെ 38 പന്തിൽ 66. ഒടുവിൽ ഇന്നലെ പഞ്ചാബിനെതിരെ 30 പന്തിൽ 60 റൺസ്. തൻ്റേതായ ദിവസങ്ങളിൽ, വാർണർക്കെതിരെ പന്തെറിയുന്നവർ, അതെത്ര ലോകോത്തര നിലവാരമുള്ളവരാണങ്കിലും, ആ പന്തുകൾ ബൗണ്ടറിയിലുള്ള പരസ്യബോർഡുകൾ തുടർച്ചയായി ചുംബിക്കുന്ന കാഴ്ച നമുക്ക് കാണാൻ സാധിക്കും.
എത്ര ഫീൽഡർമാർ നിരന്ന് നിന്നാലും ഓഫ് സൈഡുകളിലെ പഴുതുകളിലൂടെ വാർണർ പന്തു പായിച്ചു കൊണ്ടേയിരിക്കും ” ഡേവിഡ് വാർണർ ” – അതൊരു പേര് മാത്രമല്ല. വീഴ്ചകൾ ഉണ്ടാകുമ്പോൾ, അതിൽ തളർന്നു പോകാതെ, തിരിച്ചുവരവുകൾ നടത്തുന്ന ധീരരായ മനുഷ്യരുടെ മറ്റൊരു പദം കൂടെയാണ്.
ആരാധകരുടെ മനം നിറക്കുന്ന, ഒരുപാട് ഇന്നിംഗ്സുകൾ ഇനിയും ആ ബാറ്റിൽ നിന്നും പിറവിയെടുക്കട്ടെ.
കടപ്പാട്: ക്രിക്കറ്റ് കാർണിവൽ