സൂപ്പര്‍ താരം എംഎസ് ധോണി സിഎസ്‌കെയില്‍ അടുത്ത വര്‍ഷവും കളിക്കുമെന്ന് വ്യക്തമാക്കി സൂപ്പര്‍ കിംഗ്‌സ് ടീം ഉടമ എന്‍ ശ്രീനിവാസന്‍. ധോണിയില്ലാതെ ചെന്നൈയും, ചെന്നൈയില്ലാതെ ധോണിയുമില്ലെന്ന് ശ്രീനിവാസന്‍ പറഞ്ഞു. ധോണിയുടെ നേതൃത്വത്തിലാണ് ഇക്കാലയളവില്‍ ചെന്നൈ ഐപിഎല്ലില്‍ എല്ലാ വിജയങ്ങളും നേടിയതെന്നും ധോണിയില്ലാതെ ചെന്നൈ പൂര്‍ണമാകില്ലെന്നും ശ്രീനിവാസന്‍ പറഞ്ഞു.
‘ചെന്നൈ സൂപ്പര്‍ കിംഗ്സിന്റെ അവിഭാജ്യ ഘടകമാണ് ധോണി. ധോണിയില്ലാതെ ചെന്നൈ സൂപ്പര്‍ കിംഗ്സില്ല, ചെന്നൈ സൂപ്പര്‍ കിംഗ്സില്ലാതെ ധോണിയുമില്ല. ധോണി അത്രമേല്‍ ടീമിന് വേണ്ടപ്പെട്ട താരമാണ്. അടുത്ത സീസണിലും ധോണി ചെന്നൈയ്ക്ക് വേണ്ടി കളിക്കും’ ശ്രീനിവാസന്‍ പറഞ്ഞു.
ഈ സീസണോടെ ധോണി ഐപിഎല്ലില്‍ നിന്ന് വിരമിക്കുമെന്ന അഭ്യൂഹങ്ങള്‍ ശക്തമായിരുന്നു. എന്നാല്‍ എന്നാല്‍ അടുത്ത സീസണിലും തുടര്‍ന്നേക്കുമെന്ന സൂചനയാണ് ധോണി നല്‍കിയത്. ഇത് ഒന്നുകൂടി ഊട്ടിയറപ്പിക്കുന്ന പ്രതികരണമായി ചെന്നൈ ടീമിന്റെ ഭാഗത്തുനിന്നും ഇപ്പോള്‍ ഉണ്ടായിരിക്കുന്നത്.
ധോണിയുടെ നായകമികവില്‍ ഇക്കഴിഞ്ഞ ഐപിഎല്‍ കിരീടം ചെന്നൈ നേടിയിരുന്നു. ധോണിയുടെ കീഴില്‍ ചെന്നൈ നേടുന്ന നാലാം ഐപിഎല്‍ കിരീടമായിരുന്നിത്. ഫൈനലില്‍ കെകെആറിനെ 27 റണ്‍സിന് ചെന്നൈ പരാജയപ്പെടുത്തുകയായിരുന്നു.