സയ്യിദ് മുഷ്താഖ് അലി ട്രോഫിയില് തകര്പ്പന് ബാറ്റിംഗിലൂടെ തമിഴ്നാടിനെ ജേതാക്കളാക്കിയ ഷാരൂഖ് ഖാനെ ഐപിഎല് ടീം ചെന്നൈ സൂപ്പര് കിംഗ്സില് എടുക്കണമെന്ന് ആരാധകരുടെ ആവശ്യം. സൂപ്പര് കിംഗ്സ് നായകന് എം.എസ്.ധോണിയോടാണ് ക്ലബ്ബിനെ പിന്തുണയ്ക്കുന്നവര് ഈ ആവശ്യം ഉന്നയിച്ചത്. നിലവില് പഞ്ചാബ് കിംഗ്സിന്റെ താരമാണ് ഷാരൂഖ്.
സയ്യിദ് മുഷ്താഖ് അലി ട്രോഫി ഫൈനലിന്റെ അവസാന പന്തില് കര്ണാടകയുടെ പ്രതീക് ജെയ്നിനെ ഡീപ് സ്ക്വയര് ലെഗ് വഴി സിക്സിന് പറത്തി തമിഴ്നാടിന് ഷാരൂഖ് ഖാന് അവിസ്മരണീയ ജയം സമ്മാനിച്ച നിമിഷം ധോണി ടെലിവിഷനില് കാണുന്നതിന്റെ ചിത്രം സി.എസ്.കെ. ഔദ്യോഗിക ട്വിറ്റര് അക്കൗണ്ടില് പങ്കുവച്ചിരുന്നു. ചിത്രത്തിനു താഴെ വന്ന ട്വീറ്റുകളിലാണ് ഷാരൂഖ് ഖാനെ സൂപ്പര് കിംഗ്സില് കളിപ്പിക്കണമെന്ന നിര്ദേശമുണ്ടായത്.
മധ്യനിരയില് ഷാരൂഖ് മികച്ച ബാറ്ററാകുമെന്നും യുവതാരമായതിനാല് കുറഞ്ഞത് 4-5 വര്ഷം കളിപ്പിക്കാനാകുമെന്നും ആരാധകരില് ഒരാള് ട്വീറ്റ് ചെയ്തു. ഐപിഎല് ലേലത്തിനുള്ള തയാറെടുപ്പിന്റെ ഭാഗമായാണ് ധോണി മുഷ്താഖ് അലി ട്രോഫി ഫൈനല് കണ്ടതെന്ന് അഭിപ്രായപ്പെട്ടവരും കുറവല്ല. ഷാരൂഖാന്റെ വളര്ച്ചയ്ക്കു പിന്നില് ധോണിയുടെ പങ്ക് സൂചിപ്പിക്കുന്ന ട്വീറ്റും വന്നിട്ടുണ്ട്.