പ്രകൃതിയിലെ അപൂര്വ്വ പ്രതിഭാസം കണ്ടെത്തി ശാസ്ത്രലോകം. ലോകത്തെ വിസ്മയിപ്പിച്ച് സമുദ്രത്തിനടിയില് ശുദ്ധജല തടാകം കണ്ടെത്തിയിരിക്കുകയാണ് ശാസ്ത്രലോകം. അമേരിക്കന് തീരത്ത് അറ്റ്ലാന്റിക് സമുദ്രത്തിലാണ് ശുദ്ധജലം കണ്ടെത്തിയത്. പോറസ് എന്നയിനം പാറകള്ക്കുള്ളില് കുടുങ്ങിക്കിടക്കുന്ന നിലയിലാണ് ഈ ശുദ്ധജല ശേഖരമെന്നാണ് ശാസ്ത്രജ്ഞര് പറയുന്നത്.
വടക്കു കിഴക്കന് യുഎസിന്റെ തീരം മുഴുവന് നീണ്ടു കിടക്കുന്ന രീതിയിലുള്ള വലുപ്പം ഈ ശുദ്ധജല ശേഖരത്തിനുണ്ടെന്നാണ് ശാസ്ത്രജ്ഞന്മാരുടെ വിലയിരുത്തല്. 1970 മുതല് സമുദ്രാന്തര്ഭാഗത്തെ ഈ തടാകം സംബന്ധിച്ചുള്ള അനുമാനങ്ങള് ശാസ്ത്രലോകത്ത് സജീവമാണെങ്കിലും ഇത് സംബന്ധിച്ച് കണ്ടെത്തലും സ്ഥിരീകരണവും ഇത് ആദ്യമായാണ്.
ഈ മേഖലയില് ഒറ്റപ്പെട്ട പ്രദേശങ്ങളിലായി സമുദ്രത്തിനടിയില് ശുദ്ധജല ശേഖരമുണ്ടെന്ന് മാത്രമായിരുന്നു ശാസ്ത്രലോകം കരുതിയത്. എന്നാല് ഇപ്പോഴത്തെ കണ്ടെത്തല് വലിയൊരു അത്ഭുതം എന്നാണ് ഗവേഷക സംഘം പറയുന്നത്.
കൊളംബിയ സര്വകലാശാലയിലെ സമുദ്ര ഭൗമ ഗവേഷകന് ക്ലോ ഗസ്റ്റാഫ്സണും സംഘവുമാണ് ഈ പ്രതിഭാസം കണ്ടെത്തിയതിന് പിന്നില്. ന്യൂജേഴ്സിയില് നിന്ന് അധികം അകലെയല്ലാതെ സ്ഥിതി ചെയ്യുന്ന മാര്ത്താസ് വൈന്യാര്ഡ് എന്ന ദ്വീപില് നിന്നാണ് ഗവേഷണമാരംഭിച്ചത്. 2015 ലാണ് ഇവര് ശുദ്ധജല തടാകത്തെ അന്വേഷിച്ചുള്ള പഠനത്തിനു തുടക്കമിട്ടത്. 1970 കളിലെ പഠനത്തിന്റെ വിശദാംശങ്ങളുടെ പിനന്ബലത്തിലാണ് ഗവേഷണം നടത്തിയത്. മാര്ക്കസ് ജി ലാങ്സേത്ത് എന്ന കപ്പല് ആയിരുന്നു ഗവേഷണം നടത്താനായി ഉപയോഗിച്ചത്.