ഇന്ത്യൻ-അമേരിക്കൻ സാമ്പത്തിക ശാസ്ത്രജ്ഞ ഗീതാ ഗോപിനാഥിന് (Gita Gopinath) അന്താരാഷ്ട്ര നാണയ നിധി(IMF) യുടെ ഫസ്റ്റ് ഡെപ്യൂട്ടി മാനേജിംഗ് ഡയറക്ടറായി (FDMD) സ്ഥാനക്കയറ്റം ലഭിച്ചു. നിലവിലെ എഫ്ഡിഎംഡി ജെഫ്രി ഒകാമോട്ടോ അടുത്ത വർഷം ആദ്യം സ്ഥാനം ഒഴിയുമെന്ന് പ്രഖ്യാപിച്ചതിന് പിന്നാലെയാണിത്.
ഗീതാ ഗോപിനാഥ് മൂന്ന് വർഷമായി അന്താരാഷ്ട്ര നാണയ നിധിയുടെ (ഐഎംഎഫ്) ചീഫ് ഇക്കണോമിസ്റ്റ് ആയി സേവനമനുഷ്ഠിച്ചു വരികയായിരുന്നു. COVID-19 പകർച്ചവ്യാധിയുടെ പശ്ചാത്തലത്തിൽ, ഐഎംഎഫ്-ന് ഗീത ഗോപിനാഥ് നൽകിയ സംഭാവനകൾ അസാധാരണമാണെന്ന് ഐഎംഎഫ് മാനേജിംഗ് ഡയറക്ടർ ക്രിസ്റ്റലീന ജോർജീവ പ്രശംസിച്ചു.”നമ്മുടെ ജീവിതത്തിലെ ഏറ്റവും മോശമായ സാമ്പത്തിക പ്രതിസന്ധിയുടെ വഴിത്തിരിവുകളിൽ മുന്നോട്ടു പോവാൻ ആഗോള സമ്പദ്വ്യവസ്ഥയെയും ഫണ്ടിനെയും സഹായിക്കുന്നതിൽ ഗീതയുടെ ബൗദ്ധിക നേതൃത്വം സഹായിച്ചു” എന്ന് ക്രിസ്റ്റലീന പറഞ്ഞു.
ഐഎംഎഫിലെ ആദ്യ വനിതാ ചീഫ് ഇക്കണോമിസ്റ്റ് ഗോപിനാഥ് – അംഗരാജ്യങ്ങളിലും സ്ഥാപനത്തിലും ബഹുമതിയും ആദരവും നേടിയിട്ടുണ്ട്. വിവിധ പ്രശ്നങ്ങളിൽ വിശകലനപരമായി കർശനമായ പ്രവർത്തനങ്ങൾക്ക് നേതൃത്വം നൽകുന്നതിൽ ഗീത ഗോപിനാഥിന്റെ പ്രാവീണ്യം തെളിയിക്കപ്പെട്ടിട്ടുണ്ടെന്ന് ഐഎംഎഫ് മാനേജിംഗ് ഡയറക്ടർ പറഞ്ഞു.
ഗീത ഗോപിനാഥിന്റെ നേതൃത്വത്തിൽ, ഐഎംഎഫിന്റെ ഗവേഷണ വിഭാഗം കൂടുതൽ ശക്തി പ്രാപിച്ചു, പ്രത്യേകിച്ചും ലോകമെമ്പാടും സാധ്യമായ ചിലവിൽ വാക്സിനേഷൻ നടത്തുക എന്ന ലക്ഷ്യം വെച്ചുകൊണ്ട് COVID-19 പ്രതിസന്ധി അവസാനിപ്പിക്കാനുള്ള പദ്ധതിയിലെ ഗീത ഗോപിനാഥിന്റെ സമീപകാല പ്രവർത്തനങ്ങൾ മികച്ചതാണെന്ന് ക്രിസ്റ്റലീന ജോർജീവ പറഞ്ഞു.
കോവിഡ് പകർച്ചവ്യാധിയെ തുടർന്ന് ഐഎംഎഫിന്റെ 190 അംഗ രാജ്യങ്ങൾ അഭിമുഖീകരിക്കുന്ന സങ്കീർണ്ണമായ പ്രശ്നങ്ങൾ കണക്കിലെടുക്കുമ്പോൾ ഐഎംഎഫിന്റെ നേതൃത്വ നിരയിലും ഉത്തരവാദിത്തങ്ങളിലും ചില പുനഃക്രമീകരണം കൊണ്ടുവരികയാണ് എന്ന് ക്രിസ്റ്റലീന അറിയിച്ചു.
പ്രത്യേകിച്ചും, നിരീക്ഷണത്തിനും അനുബന്ധ നയങ്ങൾക്കും ഗീത ഗോപിനാഥ് നേതൃത്വം നൽകുമെന്നും ഗവേഷണത്തിന്റെയും മുൻനിര പ്രസിദ്ധീകരണങ്ങളുടെയും മേൽനോട്ടം വഹിക്കുകയും ഐഎംഎഫ് പ്രസിദ്ധീകരണങ്ങൾക്ക് ഉയർന്ന നിലവാരം കൊണ്ടുവരാൻ സഹായിക്കുകയും ചെയ്യുമെന്ന് ഐഎംഎഫ് മാനേജിംഗ് ഡയറക്ടർ പറഞ്ഞു.