റോഡ് ഗതാഗതം തടസപ്പെടുത്തിയുള്ള മതാഘോഷങ്ങള്‍ നിരോധിച്ച് ഉത്തര്‍പ്രദേശ് മുഖ്യമന്ത്രി യോഗി ആദിത്യനാദ്. ഈദ് അടക്കമുള്ള ആഘോഷങ്ങള്‍ വരാനിരിക്കേയാണ് ഉത്തരവ്. നേരത്തേ അനുവാദം വാങ്ങാതെയുള്ള ഘോഷയാത്രകളോ മറ്റോ അനുവദിക്കില്ല എന്നാണ് ഉത്തരവില്‍ പറയുന്നത്.
ആഭ്യന്തര വകുപ്പ് പ്രിന്‍സിപ്പല്‍ സെക്രട്ടറി സഞ്ജയ് പ്രസാദ്, ഡി.ജി.പി ആര്‍.കെ വിശ്വകര്‍മ, മറ്റ് ഉന്നത ഉദ്യോഗസ്ഥര്‍ എന്നിവര്‍ ചേര്‍ന്ന് നടത്തിയ റിവ്യൂ മീറ്റിലാണ് തീരുമാനം. പരമ്പരാഗതമായ മതചടങ്ങുകള്‍ക്ക് മാത്രമേ ഇനി അനുമതി നല്‍കൂ.
ആരാധനാ കേന്ദ്രങ്ങളുടെ സുരക്ഷ മുന്‍നിര്‍ത്തി പൊലീസ് സേനയെ വിന്യസിക്കുമെന്ന് ഡിജിപി വിശ്വകര്‍മ പറഞ്ഞു. ഇതുമായി ബന്ധപ്പെട്ട് സോഷ്യല്‍ മീഡിയയില്‍ വ്യാജവാര്‍ത്തകള്‍ പ്രചരിപ്പിക്കുന്നത് തടയാനും ഉദ്യോഗസ്ഥര്‍ക്ക് നിര്‍ദേശം നല്‍കിയിട്ടുണ്ട്.
”സംസ്ഥാനത്തെ ഓരോ പൗരന്റേയും സുരക്ഷയുടെ പ്രാഥമിക ഉത്തരവാദിത്വം നമുക്ക് തന്നെയാണ്. റമദാന്‍ മാസമാണിത്. ഈദുല്‍ ഫിത്വറും അക്ഷയ ത്രിതീയയും പരശുറാം ജയന്തിയുമൊക്കെ വരാനിരിക്കുന്നു. നിലവിലെ സാഹചര്യം പരിഗണിച്ച് പൊലീസ് കൂടുതല്‍ ജാഗരൂകരായിരിക്കേണ്ടതുണ്ട്”എന്ന് ആഭ്യന്തര വകുപ്പ് പ്രിന്‍സിപ്പല്‍ സെക്രട്ടറി മാധ്യമങ്ങളോട് പറഞ്ഞു.