ലഹരി പാര്‍ട്ടിയിലും വ്യത്യസ്തനാകാന്‍ ശ്രമിച്ച പ്രമുഖ യൂട്യൂബറും ബിഗ് ബോസ് താരവുമായ എല്‍വിഷ് യാദവ് അറസ്റ്റില്‍. ലഹരി പാര്‍ട്ടിയില്‍ പാമ്പിന്‍ വിഷം ഉപയോഗിച്ച സംഭവത്തിലാണ് എല്‍വിഷ് നോയിഡ പൊലീസിന്റെ പിടിയിലായത്. കഴിഞ്ഞ വര്‍ഷം നവംബറില്‍ നടന്ന കേസിലാണ് അറസ്റ്റ്.
അറസ്റ്റിന് പിന്നാലെ സൂരജ്പൂരിലെ പ്രത്യേക കോടതിയില്‍ ഹാജരാക്കിയ എല്‍വിഷിനെ 14 ദിവസത്തെ ജുഡീഷ്യല്‍ കസ്റ്റഡിയില്‍ വിട്ടു. മനേകാ ഗാന്ധിയുടെ നേതൃത്വത്തിലുള്ള പീപ്പിള്‍ ഫോര്‍ ആനിമല്‍ സംഘടന നല്‍കിയ പരാതിയിലാണ് എല്‍വിഷ് ഉള്‍പ്പെടെയുള്ളവര്‍ക്കെതിരെ കേസെടുത്തത്.
സെക്ടര്‍ 51ല്‍ കഴിഞ്ഞ വര്‍ഷം നവംബര്‍ 3ന് ലഹരി പാര്‍ട്ടിയില്‍ പാമ്പിന്‍ വിഷം എത്തിച്ച അഞ്ചുപേരെ പൊലീസ് അറസ്റ്റ് ചെയ്തിരുന്നു. പ്രതികളില്‍ നിന്ന് പാമ്പിന്‍ വിഷവും പാമ്പുകളെയും കണ്ടെത്തിയിരുന്നു. ഇവരില്‍ നിന്ന് എല്‍വിഷിനെ കുറിച്ചുള്ള വിവരം പൊലീസിന് ലഭിച്ചെങ്കിലും സംഭവ സ്ഥലത്ത് ഇയാള്‍ ഇല്ലാതിരുന്നതിനാല്‍ അറസ്റ്റിലേക്ക് കടന്നില്ല.