ധൻബാദ് അഡീഷനൽ ജില്ല ജഡ്ജി ഉത്തം ആനന്ദിനെ കൊലപ്പെടുത്തിയ കേസിൽ സിബിഐക്ക് വീണ്ടും ജാർഖണ്ഡ് ഹൈക്കോടതിയുടെ രൂക്ഷ വിമർശനം. പ്രതികളെ സംരക്ഷിക്കാനും കേസിൽനിന്നു തലയൂരാനുമാണു സിബിഐ ശ്രമിക്കുന്നതെന്ന് ചീഫ് ജസ്റ്റിസ് രവി രഞ്ജൻ, ജസ്റ്റിസ് എസ്.എൻ.പ്രസാദ് എന്നിവരടങ്ങിയ ബെഞ്ച് കുറ്റപ്പെടുത്തി.
അപൂർണവും അവ്യക്തവുമായ കുറ്റപത്രം സമർപ്പിച്ചതിന് കഴിഞ്ഞ ഒക്ടോബറിലും സിബിഐയെ ഹൈക്കോടതി മുമ്പ് വിമർശിക്കുകയും ഡയറക്ടറോട് ഹാജരാകാൻ ആവശ്യപ്പെടുകയും ചെയ്തിരുന്നു.കഴിഞ്ഞ ജൂലൈ 28 നു ധൻബാദിൽ പ്രഭാത സവാരിക്കിറങ്ങിയ ജഡ്ജി ആനന്ദിനെ ഓട്ടോറിക്ഷ ഇടിച്ചു കൊലപ്പെടുത്തി എന്നതാണ് കേസ്.
ജഡ്ജിയാണെന്ന് അറിഞ്ഞുകൊണ്ടാണു പ്രതികൾ ആക്രമിച്ചതെന്നിരിക്കെ, മൊബൈൽ ഫോൺ മോഷ്ടിക്കുന്നതിനാണ് കൊലപ്പെടുത്തിയതെന്നു വാദിക്കാൻ സിബിഐക്ക് എങ്ങനെ കഴിയുന്നുവെന്ന് നാർക്കോ അനാലിസിസ് റിപ്പോർട്ട് പരിശോധിക്കുമ്പോൾ കോടതി ചോദിച്ചു. വീണ്ടുമൊരു നാർക്കോ ടെസ്റ്റിനു സിബിഐ ഒരുങ്ങുന്നതിനെയും കോടതി വിമർശിച്ചു. 4 മാസം മുൻപു നടത്തിയ ടെസ്റ്റിലെ നിരീക്ഷണത്തിനു വിരുദ്ധമാണ് പുതിയതെങ്കിൽ ഏതു വിശ്വസിക്കുമെന്ന് ആരാഞ്ഞു.